"ეს ბურჯანაძის და უსუფაშვილის მხრიდან წინასაარჩევნო სვლებია"- სესიაშვილი საკონსტიტუციო ინიციატივებზე

პოლიტიკა - 16:03, 17 Aug, 2016

1552

საპარლამენტო უმრავლესობის წევრი, თავდაცვისა და უშიშროების კომიტეტის თავმჯდომარე ირაკლი სესიაშვილი დავით უსუფაშვილის მიერ გაჟღერებულ ინიციატივას კონსტიტუციაში საქართველოს ევროატლანტიკური არჩევანის განსაზღვრასთან დაკავშირებით,“წინასაარჩევნო სვლად“ აფასებს და აცხადებს, რომ ამ ნაბიჯით უსუფაშვილი პროდასავლურ ორიენტაციაზე ექსკლუზივის მოპოვებას ცდილობს. ამომრჩევლებზე გათვლილ ნაბიჯად აფასებს სესიაშვილი ნინო ბურჯანაძის მიერ მოთხოვნილ ქვეყნის უბლოკო სტატუსსაც:

„ცხადია, რომ ეს წინასაარჩევნო სვლებია ორივეს მხრიდან. ბურჯანაძე პოლიტიკურად ცდილობს, რომ რუსულ ორბიტაზე გაგვიყვანოს და ეს ნიშა შეავსოს. პრორუსულად განწყობილი ამომრჩევლები თავისკენ გადაქაჩოს, რაც ძალიან მცირე ნაწილია. უსუფაშვილმა როგორც ჩანს ეს ვითარება გამოიყენა და ცდილობს, რომ რაღაც პროდასავლურ ორიენტაციაზე ექსკლუზივი მოიპოვოს, რაც ასევე, ჩემი აზრით, წინასაარჩევნო პროცესის ნაწილია,“ - განაცხადა ირაკლი სესიაშვილმა.

აღნიშნულ თემაზე დღეს პარლამენტში ბიუროს სხდომა იმართება, მსჯელობის თემა ორი საკონსტიტუციო ინიციატივაა. პირველი მოქალაქეთა საინიციატივო ჯგუფის ინიციატივაა, რომელიც საქართველოს კონსტიტუციაში ქვეყნის ე,წ უბლოკო სტატუსის დაფიქსირებას გულისხმობს და ამ მიზნით მოქალაქეთა ხელმოწერების შეგროვებას ითვალისწინებს. ხოლო მეორე ინიციატივის ავტორი თავად პარლამენტის თავმჯდომარეა და ის ე.წ უბლოკო სტატუსის საპირისპიროდ ევროატლანტიკური მისწრაფებების კონსტიტუციის პრეამბულაში შეტანას ითხოვს.