ამირან გიგუაშვილის აქცია - ,,საჩუქარი თბილისის მერს"

პოლიტიკა - 11:49, 17 Aug, 2016

2983

,,ირაკლი ალასანია-თავისუფალი დემოკრატების“ გლდანის მაჟორიტარობის კანდიდატმა ამირან გიგუაშვილმა თბილისის მერიის წინ გამართა აქცია სახელწოდებით ,,საჩუქარი თბილისის მერს" .

აქციის მიზეზი გლდანის მე-8 მკ/რ-ის პატარა ტბის მიმდებარე ტერიტორიაზე წლების განმავლობაში გადაუჭრელია ნაგავსაყრელის პრობლემაა. აღნიშნული ტბის ირგვლივ ცხოვრობს მოსახლეობა და მიუხედავად სხვადასხვა ხელისუფლების დროს მათი მიმართვისა, ტერიტორია გამოიყენება როგორც სამშენებლო მასალების, ასევე საყოფაცხოვრებო ნარჩენების თავმოყრის ადგილად. ვინაიდან ტბა არის დაბინძურებული, ის არ გამოიყენება როგორც დასასვენებელი ადგილი; არის ქვეწარმავლების და ანტისანიტარიის ბუდე.

ამირან გიგუაშვილმა ახალგაზრდებთან ერთად ჩაატარა ტბის მიმდებარე ტერიტორიაზე დასუფთავების აქცია, რის შემდეგაც ნაგვის ნარჩენები სიმბოლურად მოათავსა ქაღალდის ყუთში, რომელიც გარედან დასურათებულია ნაგავსაყრელზე გადაღებული ფოტოებით. ნაგვით სავსე ყუთი ამირან გიგუაშვილმა მიიტანა თბილისის მერიასთან ქალაქ თბილისის მერისათვის გადაცემის მიზნით. აქციის ჩატარების მიზანია პრობლემის მიმართ ყურადღების გამახვილება, რათა თბილისის მერიის კეთილმოწყობის სამსახურმა და შესაბამისმა სტრუქტურებმა მოახდინონ რეაგირება.

,,დღეს თავისუფალი დემოკრატების ახალგაზრდულ ფრთასთან ერთად გლდანში, პატარა ტბის ტერიტორიაზე გვქონდა დასუფთავების აქცია. წლების განმავლობაში, მოსახლეობა ითხოვს ამ ტერიტორიის ნაგვისგან გაწმენდას, მაგრამ გლდანს პატრონი არ გამოუჩნდა. ეს არის ანიტისანიტარიის და ქვეწარმავლების ბუდე. ჩვენი შვილების ჯანმრთელობა ყოველდღიურად არის რეალური საფრთხის წინაშე. ახალგაზრდების ინიციატივა იყო, რომ დასუფთავების აქციის შემდეგ, სიმბოლურად ამ მუყაოს ყუთით წამოგვეღო პლასტიკატის ნარჩენები თბილისის მერისათვის, რათა იქნებ ახლა მაინც მიაქციოს ამ პრობლემას ყურადღება. ასეც ხდება, რომ როდესაც მერია და შესაბამისი სამსახურები არ მიდიან ნაგავსაყრელთან, ნაგავი მოდის მერიასთან. მე პირობას ვდებ, რომ 8 ოქტომბრის გამარჯვების შემდეგ, გლდანელებს სხვა პრობლემებთან ერთად დასუფთავების პრობლემაც მოუგვარდებათ და გლდანი აღარასოდეს იქნება მიტოვებული და ყურადღების მიღმა დარჩენილი რაიონი“, - განაცხადა ამირან გიგუაშვილმა.