არგუმენტირებული პასუხი არასამთავრობო სექტორს - საჯარო განხილვაზე ხელისუფლებამ ყველა საჭირო დოკუმენტაცია წარმოადგინა

პოლიტიკა - 21:38, 16 Aug, 2016

1988

დღეს ოზურგეთის დემოკრატიული ჩართულობის ცენტრში ე.წ. 9 აპრილის სახელობის სკვერში საავტომობილო გზის გაყვანასთან დაკავშირებით საჯარო განხილვა გაიმართა.

შეხვედრას ქალაქ ოზურგეთის მერი ბეგლარ სიორიძე ობიექტური მიზეზის გამო ვერ დაესწრო. მერმა შეხვედრის ორგანიზატორებს საჯარო განხილვის თარიღის შეცვლა შესთავაზა, თუმცა შეხვედრა მაინც დაანონსებულ დროს გაიმართა.

შეხვედრის ორგანიზატორები სკვერში სამუშაოების შეჩერებას და მისთვის პირვანდელი სახის დაბრუნებას ითხოვდნენ, ასევე, აცხადებდნენ, რომ აღნიშნულ სკვერში გზის გაყვანა კანონდარღვევით განხორციელდა. იყო ბრალდებები ქალაქის მერის მიმართაც, რომელსაც გადაწყვეტილების ერთპიროვნულობაში სდებდნენ ბრალს.

საჯარო განხილვაზე საკრებულოს თავმჯდომარემ ყველა საჭირო დოკუმენტაცია წარმოადგინა, შეკრებილ საზოგადოებას საკითხი ამომწურავად განუმარტა და დასმულ შეკითხვებს არგუმენტირებულად უპასუხა. გელა კობალაძის მიერ წარმოდგენილმა დოკუმენტაციამ ცხადჰყო, რომ პროექტთან დაკავშირებით სხვადასხვა ჯგუფის მიერ გაჟღერებული ბრალდებები საფუძვლს მოკლებული გახლდათ.

რაც შეეხება ბრალდებას გადაწყვეტილების ერთპიროვნულად მიღებასთან დაკავშირებით, შეხვედრაზე სიტყვით გამოვიდა არაერთი არქიტექტორი, რომელთაც აღნიშნეს, რომ ქალაქის მერმა, ხსენებულ საკითხთთან დაკავშირებით, მათთან ერთად არაერთხელ იმსჯელა. ასევე, წარმოდგენილ იქნა საკრებულოს სხდომის ოქმი, რომელმაც სკვერის გაჭრასთან დაკავშირებით საკრებულოს უმრავლესობის თანხმობა ცხადყო.

შეხვედრის ფორმატის გამო დისკუსია ცხარე კამათის ფონზე წარიმართა. თუმცა საკითხის განმარტების შემდეგ შეხვედრის მონაწილეთა უმრავლესობისთვის სკვერის მცირე ნაწილის საავტომობილო გზისთვის გამოყენება და ამით საგზაო მოძრაობის დარეგულირება ყველაზე სწორი მეთოდი აღმოჩნდა.

შეხვედრის ბოლოს არასამთავრობო სექტორი და ხელისუფლება შეთანხმდა, რომ ყველა მნიშვნელოვან საკითხთან დაკავშირებით ხელისუფლების მხრიდან, იმისთვის, რომ მსგავსი გაუგებრობა თავიდან იქნას აცილებული, არასამთავრობო სექტორის მეტი ჩართულობა იქნება გათვალისწინებული.

საჯარო განხილვას მოქალაქეები, არასამთავრობო და მედია სექტორი, ასევე, ხელისუფლებისა და ოპოზიციის წარმომადგენლები ესწრებოდნენ.