თბილისის საკრებულოს შუალედური არჩევნები შესაძლოა საპარლამენტო არჩევნების პარალელურად ჩატარდეს

პოლიტიკა - 20:25, 16 Aug, 2016

1768

საქართველოს ცენტრალური საარჩევნო კომისიის სპიკერის, ანა მიქელაძის, განცხადებით, ადმინისტრაციული ხარჯების დაზოგვის მიზნით, შესაძლოა, თბილისის საკრებულოს შუალედური არჩევნები 8 ოქტომბრის საპარლამენტო არჩევნების პარალელურად ჩატარდეს.

აღნიშნული გადაწყვეტილება საბოლოო არ არის საარჩევნო კომისია ამ თემასთან დაკავშირებით ჯერჯერობით მსჯელობს:

„ცენტრალური საარჩევნო კომისია იმსჯელებს აღნიშნულ საკითხთან დაკავშირებით და შეეცდება, ადმინისტრაციული ხარჯების მაქსიმალური დაზოგვის გამო, შუალედური არჩევნები დაემთხვეს საქართველოს პარლამენტის არჩევნებს. თუმცა, ეს არ არის ჯერჯერობით გადაწყვეტილი,“ - განაცხადა ანა მიქელაძემ.

მაჟორიტარმა წევრებმა თბილისის მუნიციპალიტეტის საკრებულოს საკუთარი უფლებამოსილების შეწყვეტის შესახებ განცხადებით მას შემდეგ მიმართეს, რაც პარტიამ „ქართული ოცნება - დემოკრატიული საქართველო“ 2016 წლის ოქტომბერში დაგეგმილი საპარლამენტო არჩევნებისთვის საქართველოს პარლამენტის მაჟორიტარი დეპუტატობის კანდიდატებად წარადგინა. უფლებამოსილების ვადამდე გლდანის, კრწანისისა და ისნის რაიონების მაჟორიტარ დეპუტატებს ნინო გოგუაძეს, ბექა ნაცვლიშვილსა და ირაკლი აბუსერიძეს შეუწყდა.