ივანიშვილთან შეხვედრას აზრი არ აქვს, არ გავახარებ ზოგიერთებს

ივანიშვილთან შეხვედრას აზრი არ აქვს, არ გავახარებ ზოგიერთებს - ბედუკაძის მუქარა ხელისუფლებას

პოლიტიკა - 16:40, 16 Aug, 2016

21028

პარტია „ცენტრისტების“ წარმომადგენლებმა 2016 წლის საპარლამენტო არჩევნებში შესაძლოა ვალერი კვარაცხელიას პარტიის, „ნეიტრალური საქართველოს“ სახელით მიიღონ მონაწილეობა.

როგორც "ნიუპოსტს" ლადო ბედუკაძემ განუცხადა, ბევრი პარტიაა, რომლებმაც ცესკოში უკვე გაიარეს რეგისტრაცია, თუმცა ჯერ კონსულტაციები არავისთან გაუმართავთ.

რაც შეეხება ცენტრალური საარჩევნო კომისიის გადაწყვეტილებას, რომლის მიხედვითაც "ცენტრისტები" რეგისტრაციიდან მოხსნეს, ბედუკაძე ამბობს, რომ "ხელისუფლებამ მის წინააღმდეგ გაილაშქრა და უგუნური გადაწყვეტილება მიიღო".

"ხელისუფლების დამსახურებით, ცესკოს გადაწყვეტილება პირდაპირი შეტევა იყო ერთი კაცის წინააღმდეგ. არამგონია ეს წულუკიანის გადაწყვეტილება ყოფილიყო, "ქართული ოცნების" ხელისუფლებაში არიან წინა ხელისუფლების ნარჩენები, მათ ქართველი ხალხი განაჩენს აუცილებლად გამოუტანს. ხელისუფლებამ დაპირებების რესურსი უკვე ამოწურა - 2012 წელს რა დაპირებებიც გასცეს მაგაზე მეტს რას დაჰპირდებიან.

ბედუკაძემ "ნიუპოსტთან" საუბრისას ისიც აღნიშნა, რომ 2012 წელს "ქართული ოცნების" ხელისუფლებაში მოსვლას გარკვეულ წილად ციხის კადრებმა შეუწყო ხელი, თუმცა "ხელისუფლებას ამის აღიარების ვაჟკაცობა არ ჰყოფნის".

"კადრები "ოცნებისადმი" განკუთვნილი არ იყო, ამ კადრებმა დაარწმუნა დასავლელი პარტნიორები, რომ სააკასვილი უნდა წასულიყო ხელისუფლებიდან. რაც შეეხება მოქმედ ხელისუფლებას ისინი უგუნურები არიან, ზოგიერთი მათგანი ღირსი იყო სააკაშვილის რეჟიმის. ღირსები იყვნენ რომ სააკაშვილი მათ ჩარეციხილებს უწოდებდა"- აღნიშნა ბედუკაძემ.

ამასთან თუ რამდენიმე დღის წინ ლადო ბედუკაძე ამბობდა, რომ ივანიშვილის აზრს გაითვალისწინებდა დღეს ციხის სკანდალური კადრების ავტორმა "ნიუპოსტს" უთხრა, რომ ყოფილ პრემიერთან კომუნიკაციას აზრი არ აქვს.

"შეხვედრას აზრი არ აქვს, ჩვენ პარტიას არჩევნებში მონაწილეობა აკრძალული აქვს, თუმცა არ გავახარებ ზოგიერთებს, პოლიტიკიდან წასვლას არ ვაპირებ"- დასძინა ციხის სკანდალური კადრების ავტორმა.

ცნობისთვის, ბედუკაძის პარტია ცესკომ რეგისტრაციიდან მოხსნა. პროკურატურამ ამ უკანასკნელს სახელმწიფო დაცვაც მოუხსნა.