პარლამენტის ბიუროზე კვორუმი არ შედგა- სხდომას ენმ და "ქართული ოცნება" არ დაესწრნენ

პოლიტიკა - 16:58, 15 Aug, 2016

1682

პარლამენტის ბიუროს სხდომა, რომელიც დღეს იყო ჩანიშნული, კვორუმის არარსებობის გამო ვერ შედგა. აღნიშნულ ფაქტთან დაკავშირებით კომენტარი პარლამენტის თავმჯდომარემ გააკეთა და აღნიშნა, რომ პარლამენტის ისტორიაში ეს უცნაური დღეა, რაგდან საკანონმდებლო საქმიანობას არ ესწრება როგორც „ნაციონალური მოძრაობა“. ასევე „ქართული ოცნებაც“. ბიუროს სხდომის ჩასატარებლად 17 დეპუტატის დასწრება იყო საჭირო თუმცა მხოლოდ 9 დეპუტატი გამოცხადდა "რესპუბლიკელების", "თავისუფალი დემოკრატების", "ეროვნული ფორუმის" და "მრეწველების" პარტიებიდან.

ბიუროს სხდომაზე დღეს ორ საკონსტიტუციო ინიციატივაზე უნდა ემსჯელათ. პირველი მოქალაქეთა საინიციატივო ჯგუფის ინიციატივა იყო, რომელიც საქართველოს კონსტიტუციაში ქვეყნის ე,წ უბლოკო სტატუსის დაფიქსირებას გულისხმობს და ამ მიზნით მოქალაქეთა ხელმოწერების შეგროვებას ითვალისწინებს. ხოლო მეორე ინიციატივის ავტორი თავად პარლამენტის თავმჯდომარე იყო და ის ე.წ უბლოკო სტატუსის საპირისპიროდ ევროატლანტიკური მისწრაფებების კონსტიტუციის პრეამბულაში შეტანას ითხოვს.

„ჩემთვის უცნობია მიზეზი და მოტივი, რატომ ვერ შეძლეს კოლეგებმა სხდომაზე მოსვლა. მე მქონდა მცდელობა დაკავშირების, მაგრამ ვერ შევძელი“- განაცხადა დავით უსუფაშვილმა. პარლამენტის თავმჯდომარის განცხადებით, ბიუროს სხდომა 17 აგვისტოს, 15:00 საათზე ჩაინიშნა.

საპარლამენტო უმრავლესობის წევრებმა ბიუროს სხდომაზე არდასწრება ”ქართული ოცნება-დემოკრატიული საქართველოს” მიერ დღეს დაგეგმილი პარტიული ღონისძიებით ახსნეს. დღეს ოცნება თბილისის რაიონების მაჟორიტარობის კანდიდატების დასახელებას გეგმავს.