"ნაციონალური მოძრაობა" "ცენტრისტების" წინააღმდეგ საკონსტიტუციო სასამართლოს მიმართავს

პოლიტიკა - 12:25, 15 Aug, 2016

1832

”ნაციონალური მოძრაობა” ”ცენტრისტების” არაკონსტიტუციურად გამოცხადებასთან დაკავშირებით საკონსტიტუციო სასამართლოს მიმართავს.
როგორც დღეს გამართულ პრესკონფერენციაზე პარტიის ერთ-ერთმა ლიდერმა სერგი კაპანაძემ განაცხადა, მსგავსი ტიპის პარტიის არსებობა ხელს უწყობს საქართველოში რუსული პროპაგანდის გავრცელებას.

”ვეთანხმებით სამოქალაქო საზოგადოებას, რომ ამ პოლიტიკური გაერთიანების და კლიპის შინაარსი არის ანტიკონსტიტუციური. აქედან გამომდინარე, უახლოეს დღეებში, შესაძლებელია დღესვე, საპარლამენტო უმცირესობის ფარგლებში 30 დეპუტატის მეშვეობით მივმართოთ საკონსტიტუციო სასამართლოს, რომ ეს პოლიტიკური გაერთიანება იქნას გამოცხადებული არაკონსტიტუციურად"- თქვა კაპანაძემ.
მისი თქმით, მოქმედი ხელისუფლება ბედუკაძეს უმადლის რომ მოიგეს 2012 წლის არჩევნები.
"ამის მერე მათ ბედუკაძე აქციეს პრაქტიკულად გმირად. ის არამარტო გაათავისუფლეს პასუხისმგებლობისგან ისეთ დარღვევებზე, როგორიც არის წამება და სასტიკი მოპყრობა, არამედ ამის მერე ყველანაირ პატივში ჰყავთ. მას ჰყავს სახელმწიფო დაცვა. ის არის ერთ-ერთი საინფორმაციო სააგენტოს მფლობელი. მან ყველანაირი შეზღუდვის გარეშე მოახერხა ის, რომ ეს პარტია - „ცენტრისტები“ გახდა საყოველთაო საუბრის საგანი მეორე, ანალოგიურად ოდიოზურ ინდივიდ ბატონ ხაჩიშვილთან ერთად”, - განაცხადა სერგი კაპანაძემ.

მისივე თქმით, დიდი ალბათობით ბედუკაძე დღესაც ფინანსდება ხელისუფლების მხრიდან.

იგი ასევე გამოეხმაურა ხელისუფლების წარმომადგენლების მხრიდან გუშინ „ცენტრისტებთან“ დაკავშირებით გაკეთებულ განცხადებებს და აღნიშნა, რომ ხელისუფლების წარმომადგენლების შეშფოთება არის ცინიკური და ორპირობა.

"ცენტრისტების" რეგისტრაციიდან გაუქმების მოთხოვნით საკონსტიტუციო სასამართლოში სარჩელის შეტანის ინიციატივით გუშინ მმართველი გუნდიც გამოვიდა.

ლადო ბედუკაძის და ნიკოლოზ ხაჩიშვილი ამომრჩეველს 400-ლარიან რუსულ პენსიას, საქართველოში რუსული ჯარის დაკანონებას და რუსეთთან ორმაგ მოქალაქეობას ჰპირდება