"უბლოკო სტატუსი" VS "ევროატლანტიკური ინტეგრაცია"- რა არჩევანს გააკეთებენ საპარლამენტო პარტიები

პოლიტიკა - 11:43, 15 Aug, 2016

2009

კონსტიტუციაში ქვეყნის ევროატლანტიკურ არჩევანთან დაკავშირებით ჩანაწერის გაკეთების შესახებ „რესპუბლიკური პარტიის“ ინიციატივას, მხარს „ნაციონალური მოძრაობა“ და „თავისუფალი დემოკრატებიც“ უჭერენ და შესაბამის დოკუმენტზერ ხელმოწერას აპირებენ. რესპუბლიკელი თამარ კორძაიას განმარტებით, კონსტიტუციაში ევროატლანტიკური არჩევანის დაფიქსირება საფრთხეების თავიდან ასაცილებლად არის საჭირო, ერთ-ერთ საფრთხედ კი კორძაია ე.წ უბლოკო სტატუსის შესახებ ნინო ბურჯანაძის ინიციატივას მიიჩნევს:

„რას ნიშნავს ეს უბლოკო და რა შედეგებს მოიტანს ჩვენი ქვეყნისთვის და საზოგადოებისთვის ამაზე არაფერს არ ეუბნებიან ადამიანებს და ამიტომ მათი დაპირებები საფრთხის მომცველია ჩვენი ქვეყნისათვის, ამ საფრთხის არიდების მიზნით შევთავაზეთ საზოგადოებას ეს ინიციატივა“- განაცხადა თამარ კორძაიამ.

„რესპუბლიკელებისგან“ განსახვავებით აღნიშნული ინიციატივას წინასაარჩევნო კამპანიად მიიჩნევს საპარლამენტო უმრავლესობა, მათი განმარტებით საქართველოს საგარეო კურსი ისედაც გარკვეულია და ეჭვქვეშ არ დგას.

„ამის განსაკუთრებულ მიზანშეწონილობას და აუცილებლობას ვერ ვხედავ. ისინი ამ ფორმით ამომრჩევლის ყურადღების მიპყრობას ცდილობენ და წინასაარჩევნო ქმედებებთან არის დაკავშირებული“- განაცხადა საპარლამენტო უმრავლესობის წევრმა გიორგი კახიანმა.

„ნაციონალური მოძრაობის“ წევრი გიგი წერეთლის თქმით, კონსტიტუციაში მსგავსი ჩანაწერის გაკეთება ენმ-ს მიზანშეწონილად მიაჩნია და კარგი იქნებოდა, ეს გადაწყვეტილება უფრო ადრეც ყოფილიყო მიღებული:

„ჩვენ გვქონდა ბევრი ინიციატივა სხვადასხვა ტიპის დოკუმენტებში, მათ შორის საქართველოს კონსტიტუციაშიც ასახულიყო ეს გადაწყვეტილება , მუდმივად გვხვდებოდა წინააღმდეგობა და უარი. დღეს ჩვენ ვხედავთ ასეთ ინიციატივას რესპუბლიკური პარტიის მხრიდან, კარგი იქნებოდა ეს ადრე გაკეთებულიყო“- აღნიშნა გიგი წერეთელმა.

ინიციატივას მხარს უწერს და ევროინტეგრაციაში მისი გუნდის მიღწევებზე საუბრობს „თავისუფალი დემოკრატების“ ლიდერი ირაკლი ალასანიაც:

“თუ კი პარლამენტში ეს საკითხი დადგება აუცილებლად დავუჭერთ მხარს, იცით, რომ ჩვენ ძალიან გამოკვეთილად ვართ ის პარტია, რომელსაც შეტანილი აქვს დიდი წვლილი ჩვენ ევროპულ დაახლოებაში და ინტეგრაციაში“ - განაცხადა ირაკლი ალასანიამ.