ხელისუფლებისა და ოპოზიციის წარმომადგნლების დაპირისპირების ფონზე მიმდინარეობდა დღეს, ზოტიყელობის სახალხო დღესასწაული, რომელიც ეს ესაა დასრულდა.

დღესასწაული, რომლის თანადამფინანსებელი ხულოს მუნიციპალიტეტი იყო, აჭარა-გურიის საზღვარზე, კურორტებს ბახმაროსა და ბეშუმს შორის ყოველწლიურად ამ დროისთვის იმართება.

დაპირისპირება ადგილობრივ მოსახლეობასა და ხელისუფლებას შორის მას შემდეგ დაიწყო, როცა ადგილობრივმა მოსახლეობამ, ძირითადად ახალგაზრდობამ, ხელისუფლებას სცენაზე გამოფენილი "ქართული ოცნების" დროშის, სახელმწიფო დროშით ჩანაცვლება მოსთხოვა.

პარტიული დროშის ჩამოხსნაზე ყველაზე დიდი წინააღმდეგობა ახალგაზრდებს ხულოს გამგებელმა, ბესიკ ბაუაჩაძემ გაუწია, რასაც ორ მხარეს შორის სიტყვიერი დაპირისპირება მოჰყვა. ადგილზე იმყოფებოდა პოლიციაც.

მდგომარეობა მას შემდეგ განიმუხტა, რაც ხელისუფლებამ ადგილობრივების მოთხოვნა დააკმაყოფილა, "ქართული ოცნების" დროშა სცენიდან მოხსნა და ერთ ერთი აქტივისტის ავტომანქანაზე დაამაგრა. მოსახლეობის მოთხოვნით მოიტანეს სახელმწიფო დროშაც და სცენაზე პარტიის დროშის ნაცვლად გაფინეს.

დღესასწაულს ხულოს ხელისუფლების გარდა, "ნაციონალური მოძრაობიდან" ბათუმისა და ოზურგეთის მაჟორიტარი დეპუტატობის კანდიდატები, ლევან ვარშალომიძე და დავით მჟავანაძე ესწრებოდნენ
.