სოფელ რუხიდან ოკუპანტების მიერ ქართველების გატაცების ფაქტს აფხაზეთის ავტონომიური რესპუბლიკის თავმჯდომარე ვახტანგ ყოლბაია გამოეხმაურა. იგი ამ ფაქტს გაუგებრობას უწოდებს და მიაჩნია, რომ სათევზაოდ ჩასული მოქალაქეების დაკავება ამორალური საქციელია.

"ეს ყველაფერი გაუგებრობაა და ამ დღეებში გაირკვევა. არაფერ შუაში არ არის ის გალელი პიროვნება, რომლებიც სათევზაოდ გავიდნენ, ამ პაპანაქებაში წყალს, რომ მიაშურეს ამის გამო რომ დაიჭირო და გაიყვანო ეს არის ამორალური საქციელი. მე ვფიქრობ, რომ შესაბამისი შეფასება მიეცა, მაგრამ რეალური შედეგიც უნდა მოჰყვეს და ეს ბიჭები უნდა დაუბრუნდნენ საკუთარ ოჯახებს,"- აცხადებს ყოლბაია.

ამავე თემაზე განცხადება გააკეთა თავდაცვის მინისტრმა ლევან იზორიამ.

"ეს ფაქტები სამწუხაროდ ხდება, როდესაც საოკუპაციო ხაზზე ხდება უკანონოდ ჩვენი მოსახლეობის დაკავება. იცით რომ მოქმედებს ცხელი ხაზი, ევროკავშირის სადამკვირვებლო მისია ამაზე ინფორმირებულია. გალში ამოქმედდა IPRM- ის მექანიზმი. ბუნებრივია იქნება რეაგირება,"- აცხადებს იზორია.