საზოგადოებრივ მაუწყებელზე გასული ხაჩიშვილი-ბედუკაძის საარჩევნო კლიპის თაობაზე განცხადებას ავრცელებს "აფხაზთა კრების" ლიდერი მალხაზ პატარაია. მისი აზრით, აღნიშნული კლიპი ვიზუალურად და შინაარსობრივად ჩვენი ქვეყნის სრული ოკუპაციისაკენ მოწოდებაა.

"დავარქვათ ყველაფერს თავისი სახელი. ეს არის საქართველოს წინააღმდეგ აგრესიული ომის პროპაგანდა.

მაუწყებლობის შესახებ კანონი ამბობს:
მუხლი 56. პროგრამული შეზღუდვები
იკრძალება ომის ნებისმიერი სახით პროპაგანდა.

საზოგადოებრივი მაუწყებლის მესვეურებმა სწორედ ამ ნორმის საფუძველზე უნდა აკრძალონ ეს საზიზღრობა და ნუ მოგვერიდება ტერმინების.

ხოლო, საქართველოს პროკურატურამ კლიპის ავტორთა მიმართ იხელმძღვანელოს საქართველოს სისხლის სამართლოს კოდექსის 308-ე (საქართველოს ტერიტორიული ხელშეუხებლობის დარღვევა), 317-ე (მოწოდება საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ) და 319-ე (უცხო ქვეყნისათვის, უცხოეთის ორგანიზაციისათვის ან უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარება) მუხლებით და დაუყოვნებლივ დაიწყოს გამოძიება ამ გარეწრების წინააღმდეგ.

ორიოდე დღის წინ ჩატარებულ საპროტესტო აქციაზე სწორედ ამის თაობაზე აფრთხილებდა ,,აფხაზთა კრება“ საზოგადოებასა და პრეზიდენტს. აი, ჩვენი გულგრილობის კიდევ ერთი, მეტად სახიფათო და საგანგაშო შედეგი.

თუ უმოქმედოა ხელისუფლება, უნდა იმოქმედოს ხალხმა!" - წერს პატარაია თავის ფეისბუქის გვერდზე.