მერაბიშვილის საკნიდან გაყვანის საქმეზე გამოძიება განახლდა - პროკურატურაში ლალი მოროშკინა იკითხება

პოლიტიკა - 12:48, 13 Aug, 2016

3405

სტრასბურგის სასამართლოს გადაწყვეტილების შემდეგ საქართველოს ყოფილი პრემიერ-მინისტრის ვანო მერაბიშვილის საქმეზე გამოძიება განახლდა.

პროკურატურაში პოლიტიკური მოძრაობა ”თამაზ მეჭიაური - ერთიანი საქართველოსთვის” წევრ ლალი მოროშკინას დაკითხვა მიმდინარეობს.
მოროშკინას ვანო მერაბიშვილის საქმეზე სტრასბურგის ადამიანის უფლებათა ევროპული სასამართლოს დადგენილებასთან დაკავშირებით კითხავენ.

როგორც დაკითხვაზე შესვლამდე ლალი მოროშკინამ ჟურნალისტებს განუცხადა, ის 2014 წელს სასჯელაღსრულების დეპარტამენტის თავმჯდომარის მრჩეველი იყო და იმ პერიოდში არსებულ დარღვევებთან დაკავშირებით სხვადასხვა უწყებას მიმართა.

”2014 წელს მე ვიყავი სასჯელაღსრულების დეპარტამენტის თავმჯდომარის მრჩეველი და იყო რიგი დარღვევები, რასთან დაკავშირებითაც მე პროტესტიც გამოვთქვი, სხვადასხვა უწყებას მივმართე, რომ მე ვიყავი მრჩეველი და ცხადია, ჩემს კომპეტენციაში შედიოდა როგორც რჩევის მიცემა, ასევე იმ უკანონობის ალაგმვა, რაც იმ პერიოდში დეპარტამენტში ხდებოდა. მაშინ პირველი რაზეც მე გავამახვილე ყურადღება, ეს იყო ზონდერების დანიშვნა მაღალ თანამდებობებზე, ეს იყო იდენტიფიცირებული ზონდერების ჯგუფი, რომლებიც მოვიდნენ დეპარტამენტის სათავეში”, - განაცხადა ლალი მოროშკინამ.

2 წლის წინ სასამართლო სხდომაზე ვანო მერაბიშვილმა განაცხადა, რომ ის მთავარი პროკურორის, ოთარ ფარცხალაძის, დავალებით საკნიდან გაიყვანეს და აიძულებდნენ, ზურაბ ჟვანიასა და მიხეილ სააკაშვილის საქმეებზე მიეცა ჩვენება მესამე პრეზიდენტის წინააღმდეგ.

მერაბიშვილის განცხადებასმაშინ პროკურატურის მხრიდან რეაგირება არ მოჰყოლია.

გამოძიება მხოლოდ მას შემდეგ განახლდა, რაც სტრასბურგის სასამართლომ საქართველოს ამ საქმეზე სრულფასოვანი გამოძიების ჩატარება დაავალა.