,,პაატა ბურჭლაძე - სახელმწიფო ხალხისთვის“ საარჩევნო სიასთან დაკავშირებით სარჩელი შეიტანა

პოლიტიკა - 19:51, 12 Aug, 2016

4216

მოძრაობა „პაატა ბურჭულაძე - სახელმწიფო ხალხისათვის“ თბილისის საქალაქო სასამართლოში საჩივარი შეიტანა. საქმე ეხება ცენტრალური საარჩევნო კომისიის 2016 წლის 10 აგვისტოს დადგენილებას, რომლის მიხედვით, ცესკოს ამომრჩეველთა ერთიან საარჩევნო სიაში შეყავს რეგისტრაციიდან მოხსნილი ან მისამართის მითითების გარეშე რეგისტრირებული ამომრჩეველი მისი ბოლო რეგისტრაციის ადგილის ან ფაქტობრივი მისამართის მიხედვით. როგორც პაატა ბურჭულაძის მრჩეველმა სამართლებრივ საკითხებში დავით ჯანდიერმა განაცხადა, აღნიშნული მოწესრიგება ეწინააღმდეგება საქართველოს საარჩევნო კოდექსს. ეს დადგენილება იძლევა საშუალებას ხელისუფლებას სიაში ჰყავდეს ინერტული პირები, პასიური ამომრჩევლები და საჭიროების შემთხვევაში მოახდინოს შესაბამისი მანიპულაცია.

„საქართველოს საარჩევნო კოდექსის თანახმად, ამ ტიპის ამომრჩევლის რეგისტრაცია უნდა მოხდეს უშუალოდ მისი მიმართვის საფუძველზე, ხოლო დადგენილება ითვალისწინებს ავტომატურ რეგისტრაციას სამოქალაქო რეესტრის ეროვნული სააგენტოს მონაცემების მიხედვით. ამით, ხელისუფლებას ექმნება კარგი შესაძლებლობა სიაში ჰყავდეს ინერტული პირები, პასიური ამომრჩევლები და საჭიროების შემთხვევაში მოახდინოს შესაბამისი მანიპულაცია. დადგენილების არსებობა ვერ გამართლდება საარჩევნო უფლების დამატებითი გარანტიების შექმნის არგუმენტით, რადგან აქტიურ ამომრჩეველს არსებული მოწესრიგებით სრულად აქვს გარანტირებული არჩევნებში მონაწილეობა. ამგვარი მოწესრიგება ეწინააღმდეგება ხელისუფლების განცხადებებს იმასთან დაკავშირებით, რომ არჩევნები დაზუსტებული და გამართული ამომრჩეველთა ერთიანი სიით ჩატარდება.“ - განაცხადა დავით ჯანდიერი.

სასამართლო სარჩელს 2 კალენდარული დღის ვადაში განიხილავს.