ბათუმში, ერთერთ ღამის კლუბში, საუდის არაბეთიდან ჩამოსულ ტურისტს მუქარის გზით ერთ ფინჯან ჩაიში 500 ლარი გადაახდევინეს.

ამის შესახებ სოციალურ ქსელში ფეისბუქის მომხმარებელი ნათია ჯანჯღავა წერს. როგორც ჯანჯღავას კომენტარებიდან ირკვევა, ის პირადად იცნობს უცხოეთის მოქალაქეს. როგორც ირკვევა მან მხოლოდ ჩაი მოითხოვა კლუბში შესვლის დრო. ჯანჯღავას ინფორმაციით, ტურისტს ინციდენტის შემდეგ არ დაურეკავს პოლიციაში, რადგან დაცვის წევრებმა ამის საშუალებაც არ მისცეს.

როგორც ირკვევა, კლუბის სახელია ,,ეფეს 2016“ და მდებარეობს ბათუმში აეროპორტის გზატკეცილი № 120-ში.

,,ბათუმის ერთ-ერთ ღამის კლუბში, უცხოეთის მოქალაქეს, მხოლოდ ერთ ფინჯან ჩაიში 500 ლარი გადაახდევინეს!! როცა გაუჩნდა კითხვა, რატომ ახდევინებდნენ ამდენს, დაეხვია დაცვა და მოკვლით დაემუქრნენ! თავდაპირველად 700 ლარი მოსთხოვეს, მაგრამ როცა გაიგეს, რომ მხოლოდ 500 ლარი ჰქონდა, ჩეკი გამოწერეს 500 ლარზე. ადამიანი, რომელიც არის ძალიან კეთილი და რიმელიც გასცემს უანგაროდ, რომელსაც ძალიან უყვარს საქართველო და ქუჩაში უბრალო "მათხოვრებს" 50 ლარს ურიგებს, (ანუ მისთვის არც 500 ლარის გადახდა წარმოადგენს პრობლემას), არის ძალიან შეწუხებული და აღშფოთებული ბათუმში ერთ დღიანი ვიზიტით და ამბობს, რომ ის მზად არის ყველას განუცხადოს ამის შესახებ. ის ფიქრობს, რომ მსგავსი რაღაც არცხვენს და სახელს ულახავს საქართველოს, რაც აუცილებლად იმოქმედებს ტურისტების რაოდენობაზეც“ - წერს ნათია ჯანჯღავა.