ოჯახის დეფინიცია - პრეზიდენტმა რეფერენდუმის ჩატარებაზე უარი განაცხადა

პოლიტიკა - 20:04, 09 Aug, 2016

3025

საქართველოს პრეზიდენტმა ქორწინების განსაზღვრასთან დაკავშირებით რეფერენდუმის ჩატარებას არაკოსნტიტუციური უწოდა.

ამის შესახებ ქვეყნის პირველმა პირმა სპეციალურ ბრიფინგზე განაცხადა.

მარგველაშვილის განცხადებით, თუ კი შეიძლება საუბარი ასეთ ცვლილებაზე, პრეზიდენტი ეთანხმება პრემიერის მოსაზრებას, რომ ის კანონპროექტის სახით პარლამენტმა უნდა მიიღოს.

"დიდ პატივს ვცემ რეფერენდუმს, როგორც პირდაპირი დემოკრატიის განხორციელების მნიშვნელოვან ფორმას. ვთვლი, რომ რეფერენდუმი, როგორც პირდაპირი დემოკრატიის ინსტრუმენტი, იძლევა საშუალებას, პოლიტიკოსებს გაგვაგონოს ხალხის ხმა. უნდა გავითვალისწინოთ ის, თუ რას გულისხმობს რეფერენდუმის კანონი. კანონში გარკვევით წერია, რომ რეფერენდუმი ტარდება ქვეყნის მთელ ტერიტორიაზე. მე, როგორც ქვეყნის ერთიანობისა და ეროვნული დამოუკიდებლობის გარანტი, ვალდებული ვარ პირველ რიგში დავიცვა ქვეყნის ერთიანობა და სუვერენიტეტი. მაშინ, როდესაც რუსეთის მიერ საქართველოს ტერიტორიის 20% ოკუპირებულია, მაშინ, როდესაც 2008 წლის აგვისტოდან რუსეთს საქართველოს ოკუპირებული ტერიტორიები აღიარებული აქვს დამოუკიდებელ სახელმწიფოებად, ამ რეალობაში რეფერენდუმის ჩატარება დამატებით სამართლებრივ არგუმენტს აძლევს ოკუპანტს. ამასობაში კანონში წერია, რომ ქორწინება ქალისა და მამაკაცის ერთობაა. კანონი კრძალავს კონსტიტუციის ცვლილებას სარეფერენდუმო გზით, მე ვეთანხმები პრემიერის ინიციატივას, ამაზე იმსჯელოს საქართველოს პარლამენტმა" -აღნიშნა გიორგი მარგველაშვილმა.

ცენტრალურმა საარჩევნო კომისიამ ქორწინებასთან დაკავშირებით რეფერენდუმის ჩატარების თაობაზე საინიციატივო ჯგუფის მოთხოვნა, საკუთარ დასკვნასთან ერთად, პრეზიდენტს რამდენიმე დღის წინ გადაუგზავნა.

საინიციატივო ჯგუფის მოსაზრებით რეფერენდუმი კითხვაზე პასუხის გასაცემად უნდა ჩატარდეს: - ”თანახმა ხართ თუ არა, რომ სამოქალაქო ქორწინება განისაზღვროს, როგორც ოჯახის შექმნის მიზნით კავშირი მამაკაცსა და ქალს შორის?“.