„ორ თვეში ამ ხელისუფლების მახინჯ მოდელს ჩავაბარებთ ისტორიას“

„ორ თვეში ამ ხელისუფლების მახინჯ მოდელს ჩავაბარებთ ისტორიას“ - ნიკა რურუა

პოლიტიკა - 03:50, 07 Aug, 2016

5869

არჩევნების ციებ-ცხელება დაიწყო, დაპირებებიც უხვადაა, მთაწმინდის მაჟორიტარობის კანდიდატს ნიკა რურუას და მის გუნდს წინ დიდი გეგმები აქვთ. მთავარია რა იქნება შემდეგ. დაპირება დაპირებად დარჩება და ხალხი ისევ იწუწუნებს ჭკუა ვერ ვისწავლეთ და წინასაარჩევნო სატყუარას წამოვეგეთო, თუ პირიქით ... ცხელი დღის მიუხედავად ნიკა რურუას შესახვედრად პარკში ბლომად შეიკრიბნენ.

დეპუტატობის კანდიდატს ეფერებიან, თავიანთ სატკივარს უზიარებენ, კარგ საქმეებსაც უხსენებენ და გვეიმედებიო ეუბნებიან.

„ჩემი სიტყვა არის ყველაზე ძვირფასი რაც მე გამაჩნია“- პასუხობს მათ ნიკა რურუა.ნიკა რურუა: „მე ვიქნები მაჟორიტარი, რომელიც არცერთი მთაწმინდელისთვის, არცერთი ვერელისთვის, არცერთი სოლოლაკელისთვის და არცერთი ოქროყანელისთვის საძებნელი არ გახდება.Cსამწუხაროდ დღეს აქ უამრავი ისეთი პრობლემაა, რომელიც წესით არ უნდა არსებობდეს, ადამიანებს ძალიან უჭირთ. დაახლოებით სამი კვირაა ათასობით ადამიანს შევხვდი და პირველი რამაც შოკში ჩამაგდო იყო ის უიმედობა, რომელსაც დღევანდელი მავნებელი ხელისუფლება მიზანმიმართულად ნერგავს.

ეს უნდობლობა უნდა დავამარცხოთ პირველ რიგში საკუთარ თავში, მერე საკუთარ უბანში და ქვეყანაში, უამისოდ არანაირი ცვლილება არ გამოვა.მე მჯერა, რომ ორ თვეში ამ მახინჯ მოდელს ჩავაბარებთ ისტორიას და ჩავაბარებთ ერთად. ამ პროცესში თითო ადამიანს აქვს გადამწყვეტი მნიშვნელობა. ჩვენ არა გვაქვს უფლება, რომ ჩვენი ქვეყანა აგურ-აგურ დავაშლევინოთ უგულო და მხოლოდ თავის თავზე მზრუნველ ხელისუფლებას. მათ მიერ შექმნილი მახინჯი მოდელი გამორიცხავს ქვეყნის კეთილდღეობას, წინსვლას და ყველა სასიკეთო ცვლილებას. დღევანდელი მთავრობა მუშაობს არა ხალხზე, არამედ ერთ ოლიგარქზე. ძალაუფლების წყარო არის ხალხი და არა ოლიგარქი... ეს ძალაუფლება უნდა დავუბრუნოთ ხალხს. წერტილი უნდა დაესვას მმართველობის ამ მანკიერ მოდელს.ჩვენი ხალხი იმსახურებს რომ ცხოვრობდეს უკეთ. აქ არის ამის ნიჭიც, ენერგიაც, საშუალებაც. უბრალოდ ამის პირობებს ვერ ქმნის დღევანდელი არაკომპენტენტური ხელისუფლება. ამიტომ, როდესაც მმართველი ძალა არის უუნარო და უვიცი ის უნდა შეიცვალოს, რადგან მთავრობა არსებობს ხალხისთვის და არა პირიქით. ამ მთავრობას კი ეს ხშირად ავიწყდება. ჩვენ პატარა ქვეყანა ვართ და შეგვიძლია რომ ეს პრობლემები მაქსიმალურად მალე მოვაგვაროთ. ეს არ არის ტრანსფორმაციისთვის და რეფორმისთვის უზარმაზარი სახელმწიფო, ჩვენ ერთად ყველაანი ვართ იმის უნარიანი, რომ ძალიან მოკლე ვადებში ხალხს ვაგრძნობინოთ მათი კეთილდღეობის გაუმჯობესება და ყოველდღიური ბედნიერების ხარისხის ზრდა ვაჩვენოთ. ეს შესაძლებელია, ეს არ არის ლამაზი სიტყვები, ოღონდ ამას სჭირდება გული, სული და კომპეტენცია და რაც მთავარია შრომის არდაზარება და თავგანწირვა. დღევანდელი ხელისუფლება ჩაიხრჩო კომფორტში, ეს არის ის რაც პირველ რიგში უნდა შევცვალოთ. ბიუროკრატია, რომელიც არის გაბერილი უნდა შემცირდეს, ის ფული მოხმარდეს ეკონომიკას, რაც შექმნის სამუშაო ადგილებს, სამუშაო ადგილები კი უამრავ ადამიანს შეუმსუბუქებს ყოველდღიურ ცხოვრებას. აი ეს არის ის რის გაკეთებასაც მე ვაპირებ თავდაუზოგავად.