სტიქია ბორჯომში- საკურორტო ქალაქში ზარალის დათვლა და სალიკვიდაციო სამუშაოები მიმდინარეობს

შემთხვევა - 10:37, 05 Aug, 2016

4324

ძლიერმა წვიმამ, ქარმა და სეტყვამ ბორჯომს სერიოზული ზიანი მიაყენა. დაიტბორა სახლები და კომერციული ობიექტები, წაიქცა ხეები, მოვარდნილმა ღვარცოფულმა ნაკადმა რამდენიმე ქუჩაზე მოძრაობა შეაფერხა. დაზიანდა ასფალტის საფარი. ძლიერმა ქარმა ასევე დააზიანა ელექტროგადამცემი ხაზები, რის გამოც ელექტროენერგიის გარეშე დარჩა რამდენიმე ათასი აბონენტი. ყველაზე სერიოზული დაზიანება ბორჯომის პარკმა მიიღო, სტიქიის გამო საჭირო გახდა პარკიდან ადამიანების ევაკუაცია. სტიქიის გამო დაზიანებები მიიღო ერთმა ადამიანმა.

სტიქიის შედეგად შექმნილი ვითარების გამო ბორჯომში გუშინ საღამოს ჩავიდნენ კრიზისების მართვის საბჭოს მდივანი და ინფრასტრუქტურის მინისტრი. მათ ადგილზე დაათვალიერეს შექმნილი ვითარება.

ჯანელიძის თქმით, შექმნილია საგანგებო შტაბი, რომელიც დღეს დილიდან დაიწყებს ზარალის დათვლას და განაახლებს სტიქიის შედეგების სალიკვიდაციო სამუშაოებს. კრიზისების მართვის საბჭოს ინფორმაციით, პრემიერმინისტრის დავალებით, ადგილზე მობილიზებულია ყველა შესაბამისი სამსახური, ასევე საპატრულო პოლიციისა და საგანგებო სიტუაციების მართვის სააგენტოს დამატებითი ეკიპაჟები.

დაიწყო სამუშაოები, ეს არის სადგერის მიმართულება, ეს არის პარკი, ეს არის წაღვერის მიმართულება. ლიკანის მიმართულებაზე პრობლემა უკვე აღარ გვაქვს. კრიტიკული ახლა რაც არის, ეს არის პარკი. უნდა გავასუფთავოთ პარკის ტერიტორია და ის დღის განმავლობაში სანახევროდ გაიხსნება,“- განაცხადა სახელმწიფო უსაფრთხოებისა და კრიზისების მართვის საბჭოს მდივანმა მინდია ჯანელიძემ.

ამ დროისთვის საავტომობილო გზებზე მოძრაობა აღდგენილია. მაშველებმა, საპატრულო და კრიმინალური პოლიციის თანამშრომლებმა 170-ზე მეტ შეტყობინებაზე მოახდინეს ოპერატიული რეაგირება.