მმართველი გუნდი ნაციონალურ მოძრაობას საკონსტიტუციო რევოლუციის მოწყობის მცდელობაში ადანაშაულებს. აღნიშნულ საკითხზე დღეს საგანგებო ბრიფინგი ეკა ბესელიამ და გია ვოლსკიმ გამართეს. დეპუტატები საკონსტიტუციო სასამართლოში მიმდინარე პროცესების უკან საპარლამენტო უმცირესობის ინტერესებს ხედავენ.

"წინასწარი შეთანხმება არსებობდა როგორც ჩანს სარჩელის შემომტან მხარესა და საკონსტიტუციო სასამართლოს ცალკეულ მოსამართლეს, თუ ცალკეულ მოსამართლეებს შორის, რომ შეცვლილი დამატებული სარჩელის მოთხოვნით მომხდარიყო იმ ნორმების გაუქმება, რომელიც მიზნად ისახავს კონკრეტულ პოლიტიკური ჯგუფისთვის სასურველი შედეგის დადგომას. სწორედ ამიტომ იკვეთება როგორც ჩანს ძალიან მნიშვნელოვან საქმეებზე სარჩელების შეცვლა. ერთ შემთხვევაში არის 10 გვერდით შეცვლილი სარჩელი და იგივე ნომრით დარეგისტრირებული ეს არის რუსთავი 2-ის საქმე, ე.წ. კაბელების საქმე რომელზეც მოსამართლე ტურავამ ისაუბრა. ეს არის დანაშაულებრივი ფაქტები, რომელსაც გამოძიება სჭირდება. კონკრეტულად ამ კოლეგიის ორი მოსამართლის პირდაპირი კავშირის ნაციონალურ მოძრაობასთან და ძალიან ახლო კავშირი სწორედ მათ შორის ბატონ გვარამიასთან და ამაზე ბევრი საუბარი იყო.

ეს არის კონსტიტუციური წესრიგის დარღვევა და საკონსტიტუციო სასამართლოს გზით საკონსტიტუციო ე.წ. რევოლუცია. ეს გეგმა მათ არ გამოუვიდათ და არ გამოუვათ იმიტომ, რომ კონკრეტულმა მოსამართლეებმა თავი დააღწიეს იმ გავლენას და ზეწოლას, რომელშიც ისინი წლების განმავლობაში იმყოფებოდნენ,"- განაცხადა ეკა ბესელიამ.

სპეციალურ ბრიფინგზე განცხადება გააკეთა ფრაქცია ქართული ოცნების ლიდერმა გია ვოლსკიმ.

"ფაქტიურად შემოსული სარჩელი წინასწარ არის გავლილი კონსულტაციები, ეკას მიერ დასახელებულ პირველ კოლეგიაში შემდეგ არის დამატებული და შესწორებული შინაარსობრივად. იკვეთება არც მეტი არც ნაკლები თანამშრომლობა მოსამართლეების სარჩელის შემომტანებთან, პოლიტიკურ ფიგურებთან, ანუ საქმიანი ურთიერთობაა და კონსპირაციური ამავე დროს. ქვეყნის სტაბილურობა შენარჩუნებული იქნება რასაკვირველია, არაფერი არ მოხდება. რა გეგმებიც აქვს ნაციონალურ მოძრაობას ვერ განხორციელდება, მაგრამ საზოგადოებამ თქვენი მეშვეობით ჟურნალისტებმა უნდა იცოდნენ თუ რის მცდელობასთან გვაქვს საქმე,"- განაცხადა გია ვოლსკიმ.