უშიშროების კადრი მერის მოადგილედ- ოპოზიცია ნიკოლეიშვილის დანიშვნას მოახლოებულ არჩევნებს უკავშირებს

პოლიტიკა - 17:51, 02 Aug, 2016

4044

თბილისის მერის მოადგილის პოსტზე დედაქალაქის მთავრობის ადმინისტრაციის ხელმძღვანელის გიგა ნიკოლაიშვილის დანიშვნას ოპოზიციის მხრიდან კრიტიკა მოჰყვა. საკრებულოს ოპოზიციონერი წევრების მხრიდან უარყოფითი დამოკიდებულების მიზეზი იყო, ის რომ გიგა ნიკოლეიშვილი უშიშროების კადრია. მათი შეფასებით აღნიშნული დანიშვნა საარჩევნო პროცესთან არის დაკავშირებული.

ფრაქცია „რესპუბლიკელების“ თავმჯდომარის ხათუნა სამნიძის განცხადებით უშიშროების კადრის დანიშვნა მერიის მოადგილედ არის ქვეყანაში არსებული ტენდენციის გაგრძელება. ხათუნა სამნიძემ მაგალითად თავდაცვის მინისტრის პოსტზე ლევან იზორიას დანიშვნა მოიყვანა.

„რესპუბლიკელი“ დავით ზურაბიშვილი აღნიშნულ ცვლილებას არჩევნებს უკავშირებს:

„უშიშროების კადრების მოსვლა თბილისის მერიაში საარჩევნო პროცესთან არის დაკავშირებული“- განაცხადა ზურაბიშვილმა.

ნიკოლეიშვილის კანდიდატურის წინააღმდეგი იყო საკრებულოს დამოუკიდებელი დეპუტატი ალეკო ელისაშვილიც, მისი თქმით, მისთვის გაუგებარია სამხედრო დაზვერვის ოფიცერი რატომ ინიშნება მერის მოადგილის თანამდებობაზე. ასევე მან უკმაყოფილება გამოთქვა იმასთან დაკავშირებით, რომ დღეს საკრებულოს სხდომაზე კანდიდატები თბილისის მერის მოადგილე ირაკლი ლექვინაძემ წარადგინა და არა თბილისის მერმა დავით ნარმანიამ.

საკრებულოს დეპუტატების მიერ გამოთქმულ კრიტიკას გიგა ნიკოლეიშვილმა უპასუხა. მისი განცხადებით მას ეამაყება, რომ უსაფრთხოების სფეროს წარმომადგენელია „მეამაყება, რომ ჩემს მეგობრებთან ერთად ქვეყნის უსაფრთხოებას ვიცავდი.“- განაცხადა გიგა ნიკოლეიშვილმა.

შეგახსენებთ, დღეს თბილისის საკრებულომ დედაქალაქის მერის მოადგილის პოსტებზე გიგა ნიკოლეიშვილი და ნატო ქიტიაშვილი დაამტკიცა. გიგა ნიკოლეიშვილს, საკრებულოს სხდომაზე მხარი 23-მა დეპუტატმა დაუჭირა, 17 წინააღმდეგი იყო, სამმა კი თავი შეიკავა.