რეფერენდუმი უნდა ჩატარდეს! ამის საჭიროებაში დამარწმუნა წერილებმა სხვადასხვა ქვეყნიდან

რეფერენდუმი უნდა ჩატარდეს! ამის საჭიროებაში დამარწმუნა წერილებმა სხვადასხვა ქვეყნიდან - ვიცე-სპიკერი ქორწინების დეფინიციაზე

სოც.მედია - 17:43, 02 Aug, 2016

3056

საქართველოს კონსტიტუცია უდაოდ საჭიროებს სიტყვასიტყვით მითითებას ქალისა და მამაკაცის კავშირზე - ამის შესახებ საქართველოს პარლამენტის ვიცე-სპიკერი მანანა კობახიძე ფეისვუქის გვერდზე წერს. მისი თქმით, ცესკომ უკვე მიმართა საქართველოს პრეზიდენტს რეფერენდუმის დანიშვნის თაობაზე:

,,ცესკომ პრეზიდენტს რეფერენდუმის დანიშვნის თაობაზე მიმართაო... ჯერ კიდევ საპარლამენტო უმრავლესობის (რესპუბლიკელების გარდა) სურვილიც და ძალისხმევაც იყო ის, რომ კონსტიტუციაში შესაბამისი ცვლილება, სწორედ პარლამენტს განეხორციელებინა.

ბოლომდე მართალი რომ ვიყო, ვიტყვი, რომ ამ საქმეში თავისუფალი დემოკრატებიც ჩვენთან იყვნენ, სამწუხაროდ, პარლამენტმა ეს ვერ მოახერხა (კვორუმის არარსებობის გამო) თუმცა სახალხო განხილვებზე ყველგან ჩვენ მოვისმინეთ საზოგადოების აბსოლუტური უმრავლესობის დადებითი განწყობა რეფერენდუმისადმი, ამიტომ, როდესაც ეს მოთხოვნა უკვე 200 000 ხელმოწერითაა გამყარებული, არავითარი მნიშვნელობა არა აქვს, ვინაა ამის ინიციატორი თუ ავტორი, ეს არის საზოგადოების ლეგიტიმური მოთხოვნა და რეფერენდუმი უნდა ჩატარდეს! ამის საჭიროებაში კიდევ უფრო დამარწმუნა იმ ათეულობით მომართვამ, წერილმა, რომელიც მსოფლიოს სხვადასხვა კუთხიდან მივიღე, როგორც ვიცე-სპიკერმა, იმ მოთხოვნით, რომ უკან გავითხოვოთ კონსტიტუციური კანონპროექტი და არ დავუშვათ სექსუალურ უმცირესობათა ქორწინების უფლების შეზღუდვა ამ ცვლილებით( რასაც, რა თქმა უნდა არ ვიზიარებ) როგორც ჩანს, საქართველოს კონსტიტუცია უდავოდ საჭიროებს ქორწინების დეფინიციის უფრო დაკონკრეტებას და სიტყვასიტყვით მითითებას ქალისა და მამაკაცის კავშირზე, რათა აშკარაა რისკი სამომავლოდ ბევრად უფრო ფართო ინტერპრეტაციებისა და შინაარსის იმგვარად წაკითხვის, როგორც არასოდეს უფიქრიათ და უგულისხმიათ კონსტიტუციის ავტორებს, თუ მაშინდელ კანონმდებლებს.“ - წერს კობახიძე.