ჩვენი პოლიტიკა არ იქნება არავის მიმართ საფრთხის შემცველი

ჩვენი პოლიტიკა არ იქნება არავის მიმართ საფრთხის შემცველი - ლევან იზორია

პოლიტიკა - 12:07, 02 Aug, 2016

2008

საქართველოს პრემიერ-მინისტრმა თავდაცვის უწყებაში ახალი მინისტრი ლევან იზორია წარადგინა. იზორიამ მთავრობის მეთაურს ნდობისთვის მადლობა გადაუხადა და მისი უწყების პრიორიტეტბსა და სამომავლო გეგმებზე ისაუბრა:

„პირველ რიგში, ეს გულისხმობს მშვიდობისა და უსაფრთხოების უზრუნველყოფას და მეორე - საფრთხეებისა და რისკების შეკავებას, ჩვენი თავდაცვითი შესაძლებლობების მდგრადი განვითარებით და ევროატლანტიკურ სტრუქტურებში ინტეგრაციით. პირველ კომპონენტზე როცა ვსაუბრობდი, მხედველობაში მქონდა, როგორც ქვეყნის შიგნით მშვიდობის უზრუნველყოფა, ისე, ბუნებრივია, ნატო-ს მტკიცე მხარდაჭერის ფარგლებში ჩვენი საერთაშორისო უსაფრთხოების არქიტექტურაში აქტიური მონაწილეობა, რასაც, ჩვენს სტრატეგიულ პარტნიორთან - აშშ-სთან ერთგულად განვახორციელებთ. რაც შეეხება მეორე კომპონენტს, როდესაც საფრთხეების და რისკების შეკავებაზე ვსაუბრობ, როგორც პრიორიტეტზე და ამას ვხედავ ჩვენი თავდაცვითი შესაძლებლობების გაძლიერებაში, პირველ რიგში ვგულისხმობ იმას, რომ ჩვენი პოლიტიკა არ იქნება არავის მიმართ საფრთხის შემცველი, მხოლოდ და მხოლოდ თავდაცვის შესაძლებლობებზე მიმართული და ისიც, ჩვენი შესაძლებლობების მაქსიმალურად დახვეწით, რასაც, სწორედ ჩვენი პარტნიორების - ნატოს წევრი ქვეყნების და აშშ-ის მხარდაჭერით, წლების განმავლობაში მივაღწიეთ“, - განაცხადა ლევან იზორიამ.