სამხედრო ობიექტების სკანდალი - ხიდაშელი ამბობს, რომ სამართალდამცავმა ორგანოებმა ფაქტის შესახებ იცოდნენ

პოლიტიკა - 18:29, 01 Aug, 2016

3189

თავდაცვის სამინისტროს საიდუმლო ობიექტებზე გარეშე პირის შესვლასთან დაკავშირებულ სკანდალურ ინფორმაციაზე კომენტარი გააკეთა მინისტრობიდან წასულმა თინა ხიდაშელმა. ის ამბობს, რომ მაშინ როცა მან თავიდაცვის უწყების ხელმძღვანელის პოსტზე შეცვალა მინდია ჯანელიძე, სამართალდამცავ ორგანოებს ჰქონდათ ინფორმაცია იმ კანონდარღვევის თაობაზე, რომელიც განხორციელდა უწყებაში და რომლის დროსაც თავდაცვის სამინისტროს გენერალური ინსპექციის თანამშრომელმა შეიწყვანა ტრისტან წითელაშვილი სამხედრო ობიექტებზე. ხიდაშელის თქმით, სწორედ ამ ფაქტის გამო გაათავისუფლა მან თანამდებობიდან ორმოცაძე.

,,მე ვიცი ის, რომ მოხდა კანონის დარღვევა. ამ ადამიანმა თავის უფლებამოსილებას გადაამეტა. ის მუშაობდა თავიდაცვის სამინისტროში და მას არ ჰქონდა უფლება სამხედრო ობიექტებზე მიეყვანა გარეშე პირი ვინც არ უნდა ყოფილიყო ის, არ მაინტერესებს ამ პირის გვარი და სახელი, სწორედ ამიტომ გავათავისუფლე სამსახურიდან, როგორც კი გავიგე ამის შესახებ როცა კი მოვედი თავდაცვის სამინისტროში. ეს ჩემამდე მოხდა. ორმოცაძემ დატოვა სამსახური ჩემი მოსვლისთანავე, ამიტომ ჩვენ ერთანეთთან შეხება არ გვქონია“ - აცხადებს თინა ხიდაშელი.

მისი თქმით, გამოძიება აღნიშნულ ფაქტზე მაშინვე უნდა დაწყებულიყო. ,,ეს ამბავი ახალი არ არის, თქვენ გაიგეთ გუშინ, თორემ ამის შესახებ იციან საქართველოს სამართალდამცავმა ორგანოებამ“.

ამნისტიით გამოშვებული ყოფილი სამხედრო ტრისტან წითელაშვილი, რომელიც 2008 წლის აგვისტოს ომის შემდეგ დააკავეს და სამშობლოს ღალატისთვის პატიმრობა მიუსაჯეს, მინდია ჯენალიძესთან თანამშრომლობას ადასტურებს, ტრისტან წითელაშვილის განცხადებით, მას ჯანელიძის უწყებასთან კარგი ურთიერთობა ქონდა და ჯანელიძის მინისტრობის დროს გასაიდუმლოებულ ობიექტებზე იმყოფებოდა. თუმცა ეს ურთიერთობა შემდეგ მინისტრს აღარ გაუგრძელებია და პირი რომელმაც წითელაშვილი სამხედრო ობიექტზე შეიყვანა, ხიდაშელმა სამსახურიდან გაუშვა. წითელაშვილის თქმით გოდერძი ორმოცაძე ხიდაშელმა სწორედ მასთან ურთიერთობის გამო დასაჯა.