მიროტაძე სამხედრო ობიექტებთან დაკავშირებული საქმის სკანდალზე სასწრაფო გამოძიებას ითხოვს

პოლიტიკა - 14:59, 01 Aug, 2016

1684

„ეროვნული ფორუმის“ ერთ-ერთი ლიდერის ანი მიროტაძის განცხადებით, იმ შემთხვევაში თუ პოსტკრიპტუმში გენშტაბის ყოფილი ხელმძღვანელის გიგი კალანდაძეის მიერ გავრცელებული ინფორმაცია დადასტურდა, ის რაზეც კალანდაძე საუბრობდა არის სამშობლოს ღალატი.

თუ ეს მართალია და მას აქვს შესაბამისი ინფორმაციები, ამის კვალიფიკაცია არის სამშობლოს ღალატი. ანუ ეს არის ძალიან მძიმე ბრალდება, აქედან გამომდინარე კარგად უნდა ჰქონდეს გააზრებული თვითონ კალანდაძეს, რამდენად სერიოზულ საკითხს შეეხო და იმედი მაქვს, რომ ეს განცხადებები არ არის გაკეთებული ჰაერზე და მას შესაბამისი მტკიცებულებები აქვს. ის, რომ გამოძიება უნდა დაიწყოს,ეს არის უპირობო. ამიტომ, მე არა მხოლოდ პროკურატურას მოვუწოდებ, რომ უსწრაფესად დაიწყოს გამოძიება, არამედ, თვითონ კალანდაძეს მოვუწოდებ, რომ ყველა ის დოკუმენტაცია, რომელიც არის მის ხელთ, მიაწოდოს შესაბამის ორგანოებს,“-განაცხადა ანი მიროტაძემ.

შეგახსენებთ, გუშინ გენშტაბის ყოფილმა უფროსმა გიგი კალანდაძემ განაცხადა, რომ მინდია ჯანელიძის მინისტრობის დროს , საიდუმლო სამხედრო ობიექტებზე მოხდა სამშობლოს ღალატში ბრალდებული ტრისტან წითელაშვილის შეშვება, სადაც მან ამ ობიექტების შესახებ ინფორმაცია მოიპოვა. ტრისტან წითელაშვილი საპატიმრო დაწესებულებიდან „ქართული ოცნების“ მიერ გამოცხადებული ამნისტიის შედეგად გატავისუფლდა, თუმცა ენმ-ს წევრების განცხადებით ის რუსულ სპეცსამსახურებთან თანამშრომლობს და საიდუმლო ობიექტებზე მოპოვებული ინფორმაცია, სწორედ ოკუპანტი ქვეყანას გადასცა.