,,საპატრულო ავტომანქანის სახურავზე ,,ამაყად“ მდგარი შეურაცხყოფდა მთელ ქართულ პოლიციას“

,,საპატრულო ავტომანქანის სახურავზე ,,ამაყად“ მდგარი შეურაცხყოფდა მთელ ქართულ პოლიციას“ - სდლ განცხადება

პოლიტიკა - 19:25, 28 Jul, 2016

9906

სამართალდამცავთა დაცვის ლიგა, საქართველოში ბოლო დროს გახშირებულ პოლიციელთა შეურაცხყოფის ფაქტებს ეხმაურება:

,,27 ივლისს, თბილისში, რუსთაველის გამზირზე, 15:00 საათისთვის საზოგადოებამ საპატრულო პოლიციის ეკიპაჟის ავტომანქანის სახურავზე ,,ამაყად“ მდგარი მამაკაცი იხილა, რომელიც თავისი ცინიკური ქცევითა და ქმედებით შეურაცხყოფდა შინაგან საქმეთა სამინისტროს მრავალათასიან კოლექტივს და მთელ ქართულ პოლიციას.

ეს გაუგონარი ფაქტი ცალკეული გამონაკლისი შემთხვევა არ გახლავთ. საზოგადოებას ახსოვს საპატრულო ეკიპაჟის ავტომანქანის სახურავზე მოცეკვავე მამაკაცი და პოლიციის ავტომანქანის თავზე ე.წ. ,,ძველი ბიჭის“ მიერ გადაღებული ფოტოები. სახელმწიფოსადმი ამ დამღუპველი ტენდენციის ფესვები ხელისუფლების პოლიციისადმი მიდგომაშია დამალული. პოლიციელთა მკვლელობები, დაჭრები, დასახიჩრებები, იარაღის წართმევა, სამხრეების აგლეჯვა, ცემა, შეურაცხყოფა და ღირსების შელახვა, ხელისუფლების მიერ ან უყურადღებოდ რჩებოდა, ან საერთოდ იმალებოდა, ან ამ ფაქტებზე რეაქცია სრულიად უსუსური იყო. ბუნებრივია ამ ვითარებამ, საზოგადოებაში პოლიციის ავტორიტეტის მკვეთრი ვარდნა გამოიწვია, რაც არაერთი ავტორიტეტული უცხოური ორგანიზაციების კვლევითაც დასტურდება.

თავის მხრივ პოლიციის ავტორიტეტის დაცემამ, წარმოუდგენელი გახადა საზოგადოების უსაფრთხოების ეფექტური დაცვა, რაც მკვეთრად გაზრდილ კრიმინალში და რუსთაველის გამზირზე, პოლიციის ავტომანქანის თავზე მდგარ მოქალაქეში სიმბოლურად გამოიხატა.

მტკიცედ ვაცხადებთ, რომ პოლიციელთა თავზე ერთი ან რამდენიმე დანაშაულის ჩადენისკენ მიდრეკილი მოქალაქე კი არ დგას, არამედ პოლიციელებს თავზე იმ უპრინციპო პოლიტიკოსებმა, მინისტრთა კაბინეტის წევრებმა და დეპუტატებმა გადაურეს, რომლებმაც თავისი გავლენებიდან გამომდინარე, სახელმწიფოს სახის – პოლიციელის ჯანმრთელობა და ღირსება, 100 ლარად, ადმნიისტრაციული წესით შეაფასეს!“ - ნათქვამია ორგანიზაციის განცხადებაში.