"მთავრობას სურს ქალბატონმა ევამ ევროპას დაუდგინოს სამართალი"- კახა კოჟორიძე

პოლიტიკა - 18:18, 28 Jul, 2016

1789

სტრასბურგის სასამართლოს მოსამართლეობის კანდიდატად ევა გოცირიძის წარდგენის ფაქტს პრეზიდენტის ადმინისტრაციაში კრიტიკული შეფასება მოჰყვა. პრეზიდენტის მრჩევლის კახა კოჭორიძის განცხადებით მაათვის გაუგებარია რა კრიტერიუმებით შეირჩა ევა გოცირიძის კანდიდატურა. კოჟორიძემ ევა გოცირიძის იუსტიციის საბჭოში მუშაობაც შეაფასა და განაცხადა, რომ ევა გოცირიძე ემხრობოდა ლევან მურუსიძის მოსამართლედ დანიშვნას, მაშინ როდესაც მურუსიძის სამართალს ევროსასამართლომ გამაოგნებელი უწოდა:

„ევროსაბჭოს სტანდარტები ამბობს იმას, რომ თითოეულმა სახელმწიფომ ისეთი პროცესით უნდა შეარჩიოს ადამიანის უფლებათა ევროპული სასამართლოს მოსამართლეობის კანდიდატი, რომელიც განამტკიცებს ამ სასამართლოსადმი ნდობას და მაღალ ავტორიტეტს. არ გააჩენს კითხვებს და იქნება გამჭვირვალე, ჩვენს შემთხვევაში კი სახელმწიფომ ჩაატარა ისეთი პროცესი, რომ კითხვები თავიდანვე გააჩინა და მთავრობის დღევანდელმა გადაწყვეტილებამ ამ პროცესს დამატებითი ჩრდილი მიაყენა. მაშინ როცა ანა დოლიძემ ევა გოცირიძესთან შედარებით მაღალი ქულები მიიღო კომისიიდან, ჩვენთვის გაუგებარია მთავრობის მხრიდან პრიორიტეტი ევა გოცირიძეს რა კრიტერიუმებით მიენიჭა.

ევროსასამართლომ მურუსიძის სამართალს გამაოგნებელი უწოდა, ქალბატონმა ევამ ის კვლავ მოსამართლედ დანიშნა, ახლა მთავრობას სურს ქალბატონმა ევამ ევროპას დაუდგინოს სამართალი, ჩვენ ვერ ვხსნით ეს რითია მოტივირებული.“- განაცხადა კახა კოჟორიძემ.

შეგახსენებთ, საქართველოს მთავრობამ 28 ივლისის სხდომაზე მიიღო გადაწყვეტილება, რომლითაც 2016 წლისათვის ადამიანის უფლებათა ევროპულ სასამართლოში საქართველოდან ასარჩევი მოსამართლის პოზიციაზე კანდიდატთა სამპირიან სიაში ნანა მჭედლიძის კანდიდატურის ნაცვლად საქართველოს იუსტიციის უმაღლესი საბჭოს წევრ ევა გოცირიძის კანდიდატურა შეიყვანა.