მედიაში თავდაცვის მინისტრის კანდიდატურაზე ახალი ვერსია ვრცელდება. სააგენტო ,,პირველის" ონფორმაციით, საქართველოს თავდაცვის მინისტრის თანამდებობაზე, სხვა კანდიდატებთან ერთად შესაძლოა უშიშროების ყოფილი მინისტრის, ირაკლი ბათიაშვილის კანდიდატურაც განიხილებოდეს.

აღნიშნულის გადასამოწმებლად „ნიუპოსტი“ ბათიაშვილს დაუკავშირდა, რომელმაც განაცხადა, რომ ეს ყოველივე ჭორია და მას ჯერჯერობით არავითარი შეთავაზება არ მიუღია:

„ეს ყველაფერი არის ჭორი, არ ვიცი საიდან წამოვიდა, ვფიქრობ, რომ ვიღაცის ფანტაზიის ნაყოფია, არავის არ უთქვამს ჩემთვის მსგავსი რამ. ამ ეტაპზე მე ლექციებს ვკითხულობ და ფილოსოფიურ წიგნს ვწერ, ამიტომ არც კი მიფიქრია ამ თემაზე“, - განაცხადა ჩვენთან საუბრისას ირაკლი ბათიაშვილმა.

შეგახსენებთ, რომ „რეპუბლიკურმა პარტიამ“ გადაწყვიტა 8 ოქტომბრის საპარლამენტო არჩევნებში დამოუკიდებლად მონაწილეობა, შესაბამისად რესპუბლიკელმა მინისტრებმა დაკავებული თანამდებობები უნდა დატოვონ. მათ შორის არის თავდაცვის მინისტრი თინათინ ხიდაშელი, მისი შემცვლელის კანდიდატურაზე არაერთი ინფორმაცია ვრცელდება. პრემიერ-მინისტრის განცხადებით, ხიდაშელის შემცვლელის ვინაობა პოლიტსაბჭოზე კონსულტაციების შედეგად გადაწყდება.