,,ბატონი პაპუაშვილისგან ინფორმაცია გვქონდა“ - ქეთევან ერემაძე მოსამართლეთა მიმართ ზეწოლის ფაქტებზე საუბრობს

პოლიტიკა - 12:26, 28 Jul, 2016

2471

გიორგი პაპუაშვილი მთავარ პროკურორთან შესახვედრად მზად არის, კონკრეტულად როდის მივა საკონსტიტუციო სასამართლოს თავმჯდომარე მთავარ პროკურატურაში ამაზე ინფორმაციას საგამოძიებო ორგანო არ ფლობს. გიორგი პაპუაშვილმა პროკურატურაში მისვლის გადაწყვეტილება პრემიერთან შეხვედრის შემდეგ მიიღო.

მთავრ პროკურატურაში ამ წუთებში იმყოფება საკონსტიტუციო სასამართლოს მოსამართლე ქეთევან ერემაძე. მან საგამოძიებო უწყებაში შესვლამდე ჟურნალისტებისთვის კომენტარი გააკეთა.

„ხაზგასმით მინდა ვთქვა, რომ ბატონი გიორგი პაპუაშვილის გაჟღერებული ინფორმაციიდან არცერთი არ შემეხებოდა პირადად მე, თუმცა, იმავდროულად არასწორი იქნება იმის თქმა, რომ ის, რაც ბატონმა პაპუაშვილმა გააჟღერა პირველად გავიგე, ან არაფერი ვიცოდი ამის შესახებ ან სასამართლოში ასეთი ინფორმაცია არ არსებობდა. ნამდვილად, სასამართლოში, მათ შორის მოსამართლეებთან ერთად ამაზე გვისაუბრია. ვიდრე ბატონი გიორგი ასეთ განცხადებას გააკეთებდა, რამდენიმე დღით ადრე პლენუმის ფორმატში, თითქმის ყველა მოსამართლე, ალბათ ერთის გამოკლებით, ჩვენ სხვადასხვა საკითხებს დღისწესრიგის მიხედვით ვიხილავდით და მათ შორის ბატონი გიორგი იყო რა შეწუხებული ერთ-ერთი მოსამართლის მიერ მისთვის მიწოდებული ინფორმაციით, მან ასევე მოსამართლეები დაახლოებით ისეთივე ფორმატში ჩაგვაყენა საქმის კურსში.

შემიძლია ვთქვა, რომ ჩემთან დაკავშრებით არანაირ ზეწოლას არ ჰქონია ადგილი, მაგრამ ამავდროულად ასევე შემიძლია ვთქვა, რომ ის, რაზეც საუბრობს ბატონი პაპუაშვილი ამის შესახებ ჩვენ მოსამართლეებს ინფორმაცია გვქონდა. მე ვერ მივცემ თავს უფლებას ვისაუბრო იმ მოსამართლის სახელით, რომელთანაც ეს ყველაფერი დაკავშირებულია, ეს პრინციპულად არასწორი იქნება. მე ვალდებული ვარ პატივი ვცე თითოეული მოსამართლის არჩევანს.

მე პროკურატურას მივაწვდი იმ ინფორმაციას, რა ფარგლებშიც მე მას ობიექტურად ვფლობ. თუ მოსამართლეებთანა სეთი არაჯანსაღი კომუნიკაცია აღწევს სიმწვავის იმ ხარისხს, როდესაც მოსამართლეს უწევს დაფიქრება იმასთან დაკავშირებით შეძლებს თუ არა ის ამ ფაქტობრივ გარემოებებში ობიექტური გადაწყვეტილების მიღებას, ჩემი პირადი მოსაზრება, რომ ეს ინფორმაცია უნდა მიეწოდოს გამოძიებას, დამოუკიდებლად იმისა, როგორია თითოეული მოსამართლის ნდობის ხარისხი გამოძიების შედეგებისადმი. ძალიან ღრმად მჯერა, რომ ასეთი ტიპის გამოწვევებზე ობიექტური და ეფექტური პასუხი პრინციპული და სწორი გადაწყვეტილებებია. კონკრეტულ გვარს რა თქმა უნდა ვიტყვი პროკურატურაში“, - განაცხადა ქეთევან ერემაძემ.