პრეზიდენტის პოლიტიკური მრჩეველი ფიქრია ჩიხრაძე ,,პალიტრა ნიუსის" ეთერში შს მინისტრის მოადგილის შალვა ხუციშვილის განცხადებას გამოეხმაურა იმასთან დაკავშირებით, რომ გოგოჭურის მიმართ განხორციელებული ქმედება ჩვეულებრივი საპოლიციო ქმედება იყო, რომელიც დღეში ათობით ტარდება:

„დღეს საერთოდ საოცარი განცხადება წავიკითხეთ შინაგან საქმეთა მინისტრის მოადგილის ბატონი ხუციშვილის მხრიდან, რომელმაც თქვა, რომ ეს ფაქტი პრობლემა არაა და დღეში ათეულობით ასეთ ღონისძიებას ვატარებთო. სისხლის სამართლის საპროცესო კოდექსი კი ასეთ ღონისძიებებს , როდესაც სასამართლოს ორდერის გარეშე მიდის ჩხრეკა, გადაუდებელ ვითარებაში ცნობს, ეს არის გადაუდებელი აუცილებლობიდან გამომდინარე საგამონაკლისო შემთხვევა. თუ შს მინისტრის მოადგილე გვეუბნება, რომ ისინი ასეთ საგამონაკლისო ღონისძიებებს დღეში ათეულობით ახორციელებენ, ეს არის უმძიმესი განცხადება მისი მხრიდან, მან ძალიან სერიოზული შეცდომა დაუშვა, როდესაც ასეთი განცხადება გააკეთა, მაშინ კატასტროფულ ვითარებასთან გვქონია საქმე, თუ პირდაპირ გვეუბნებიან რომ ყოველდღე ათეულობით ადამიანის უფლებებს ვარღვევთ ისე, რომ არაფერი არ გავინტერესებს და მერე ალბათ დიალოგიც ასეთი მიდის, რომ ევროპა ხომ არ გგონიათ, რომ ადვოკატს ითხოვთ, აბა ახლა ჩუმად იყავი, ამას ჩაგიდებ, ახლა შეგაშინებ და ა.შ. ეს არის ქმედებები, რომელიც ცუდად შემოუბრუნდა წინა ხელისუფლებას. რა თქმა უნდა ხელშეუხებელი არავინ არ არის, ყველა თანასწორია, მაგრამ ამასთანავე ყველას აქვს უფლება, მათ შორის პრეზიდენტის სიძესაც, რომ ისარგებლოს იმ უფლებებით რაც არის გაწერილი.“- აღნიშნა ფიქრია ჩიხრაძემ.