ექსპერტი ეკონომიკის საკითხებში, პაატა შეშელიძე ფიქრობს, რომ თამბაქოსთან ბრძოლის საკითხები გაზვიადებულია.

მისი თქმით, რეგულაციები, რომელსაც „თამბაქოს მოხმარების კანონში“ შესატანი ცვლილებები ითვალისწინებს, არაეფექტური იქნება.

როგორც ის BPI-თან ამბობს, წარმოუდგენელია დაადგინო რომელმა სიგარეტმა გამოიწვია რაიმე სახის დაავადება მაშინ, როდესაც კოლოფს შესაძლოა ბრენდის დასახელება საერთოდ არ ეწეროს.

„ჯანმრთელობასთან დაკავშირებულ საკითხებს რაც შეეხება, რთული დასამტკიცებელია, როგორი კავშირი იქნება დაავადებასა და მოწევას შორის. ასეთი რამ, რომ ადვილი დასამტკიცებელი იყოს აქამდე ყველა გამოიყენებდა ამ უპირატესობას თუნდაც იმისთვის, რომ ფული ეშოვნათ.

რაც შეეხება, ეკონომიკურ მხარეს და ვინ იხეირებს ამ რეგულაციებით, ვფიქრობ, მსხვილ კომპანიებს ეს ნაკლებად შეეხებათ. ისინი უკვე დამკვიდრებულები არიან“.

– საუბარია იმაზეც, რომ შეიძლება ბრენდის სახელწოდება საერთოდ აღარ ეწეროს სიგარეტს…

– ასეთი რამ უცხოეთშიც ვიცოდი, საკითხავია მაშინ როგორ უნდა გაყიდოს კომპანიამ სიგარეტი, თუ სახელი არ ეწერება კოლოფზე? პასუხისმგებელი ვინ იქნება? ლოგიკა ხომ უნდა იყოს…

თუ ერთი მხრივ ამბობენ დაავადებაზე პასუხისმგებლობის აღებას, თუ არ აწერია დასახელება, როგორ გავიგო, ვინ დამაავადა? როგორ უნდა მიხვდე, ვისი სიგარეტი მოწიე და დაავადდი? ეს გამორიცხულია, შეუძლებელია.

მაშინ გამყიდველს უნდა დააბრალო, რატომ მომყიდე სხვა, როდესაც მე სხვა გითხარიო… აბსურდია, სისულელემდე არ უნდა დავიდეს ეს ყველაფერი.

შეშელიძე განმარტავს, რომ მისთვის თამბაქოს მოხმარებაზე რეგულაციების დაწესება მოსაწონი არ არის.

ექსპერტი რეკლამირების საკითხსაც ეხება და აცხადებს, რომ არ შეიძლება ადამიანს მოაკლო ინფორმაცია.

„საერთოდ ძალიან გაზვიადებულია თამბაქოსთან ბრძოლა. ჩემი აზრით, თავიდან ბოლომდე ლობისტური საკითხებია. მე პირადად ცხოვრებაში არ მომიწევია, მაგრამ არც მისი რეგულირება მომწონს. არ მგონია, რომ სწორი ფორმა იყოს შერჩეული. როდესაც თამბაქოს არ მოწევენ, მოწევენ სხვა რამეს, ესეც ხომ უნდა გაითვალისწინონ.

რა თქმა უნდა, ეს რეგულაციები არაეფექტური იქნება.

რაც შეეხება რეკლამას, ეს ხომ ინფორმაციის მიწოდებაა… ადამიანს ინფორმაციას რომ მოაკლებ, რა თქმა უნდა, ამის შედეგად კარგი არაფერი იქნება. მე თუ ინფორმაცია მომაკელი, მაშინ რა გამოვიდა?“ – კითხულობს შეშელიძე.