,,ჩვენ ვისმენთ პოლიტიკოსების ამორალურ განცხადებებს“

,,ჩვენ ვისმენთ პოლიტიკოსების ამორალურ განცხადებებს“ - კალაძე პრეზიდენტს აკრიტიკებს

პოლიტიკა - 19:57, 26 Jul, 2016

2180

ნამდვილად სამწუხაროა, ის რომ ჩვენ ბოლო წლების განმავლობაში ვისმენთ ამორალურ განცხადებებს, ზნეობადაკარგულ განცხადებებს პოლიტიკოსებისგან - ეს განცხადება ვიცე-პრემიერმა და ქართული ოცნების ერთ-ერთმა ლიდერმა კახა კალაძემ ოზურგეთში ,,ქართული ოცნების“ კანიდადატის წარდგენისას ჟურნალისტებთან გააკეთა.

,,სამწუხაროდ, ეს დამკვიდრებული ტრადიციაა, თუმცა მე არაერთხელ გამიკეთებია განცხადება, რომ ჩვენ ახალგაზრდებმა საქართველოში ფაქტობრივად ყველაფერი უნდა გავაკეთოთ იმისთვის, რომ პოლიტიკა ახალ თანამედროვე საფეხურზე გადავიყვანოთ, როგორც ეს ევროპულ, ნორმალურ განვითარებულ ქვეყნებშია. მე მესმის, რომ დღეს რთულია საუბარი მორალზე, ზნეობაზე, როდესაც წინასაარჩევნო კამპანიაში ვართ ჩართულები“ - განაცხადა კალაძემ.

ვიცე-პრემიერი მიიჩნევს, რომ საქართველოს პრეზიდენტი თავისი განცხადებებით სახელმწიფოს დისკრედიტაციას ახდენს. კალაძე პრეზიდენტის ადმინისტრაციის მიერ კორცხელის ინციდენტთან დაკავშირებულ განცხადებასაც გამოეხმაურა. ვიცე-პრემიერი ფიქრობს, რომ ეს შეიძლება სამართალდამცავების მიმართ ზეწოლად იყოს აღქმული. კალაძე პრეზიდენტს მოუწოდებს, ჭორაობისგან თავი შეიკავოს.

,,ჩვენ ორი დღეა, გუშინ და დღეს ვისმენთ პრეზიდენტის არაადექვატურ განცხადებებს. აშკარად ჩანს, რომ ის ცდილობს გარკვეული დისკრედიტაცია განახორციელოს სახელმწიფო ინსტიტუტების, რაზეც დგას ნებისმიერი ევროპული ქვეყანა, რაზეც დგას ჩვენი სახელმწიფო, სამშობლო. ეს ადამიანი თავისი განცხადებებით ცდილობს, რომ დისკრედიტაცია მოახდინოს. ასევე, მინდა გავაკეთო განცხადება იმაზე, რომ აშკარად ჩანს, რომ ის არის დაბნეული ამ განცხადებების გამო, ალბათ იმის გამო, რა რეაქცია მოჰყვა საზოგადოებაში მის გამოსვლებს. გუშინ, დღეს მისი ადმინისტრაციის განცხადებებს. შეიძლება ამის გამოც, თუმცა ეს არ არის საფუძველი იმისა, რომ მაგალითად კორცხელის ინციდენტი დააკავშიროს ჩემთან. ეს მე მაფიქრებინებს იმას, რომ გარკვეულწილად შეიძლება აღქმული იყოს ზეწოლად სამართალდამცავების მიმართ. ასევე, მინდა ავღნიშნო ერთი ფაქტი, რომ ის ყოველთვის საუბრობს, რომ არ არის „ქართული ოცნების“ პრეზიდენტი, ან თუნდაც „ნაციონალური მოძრაობის“, თუმცა მისი განცხადებები არის ციტირება „ნაციონალური მოძრაობისა“ და მე არ მახსოვს, ყოველშემთხვევაში, რაც ის პრეზიდენტია, რომ მას გაეკეთებინა განცხადება, თუნდაც, კარალეთში მომხდარი ინციდენტის გამოძიებასთან დაკავშირებით. თუნდაც გაეკეთებინა განცხადება იმ ზონდერებთან დაკავშირებით, ვინც წლების განმავლობაში რა მდგომარეობაში აგდებდა ჩვენი ქვეყნის მოსახლეობას და როგორ უსწორდებოდნენ ქართველ ხალხს. ასეთი განცხადებები მისი მხრიდან არ მახსოვს, ხოლო ციტირებები „ნაციონალური მოძრაობისა“ ძალიან ხშირია. მე მინდა მას მოვუწოდო თავი შეიკავოს ჭორაობისაგან. ის არის ქვეყნის პრეზიდენტი. მერე რამ, რომ გარკვეული ადამიანების ხათრით იქნა არჩეული. ის პრეზიდენტია. პატივი სცეს ამ ინსტიტუტს და თავი შეიკავოს ჭორაობისგან“ - განაცხადა კახა კალაძემ.