ჩვენ ისე მოვიტანთ პროგრესს ქვეყანაში, რომ არ გადავივლით ჩვენი თანამოქალაქეების ღირსებაზე, მის გათელვაზე, - ეს განცხადება საქართველოს პრემიერ-მინისტრმა, „ქართული ოცნება - დემოკრატიული საქართველოს“ თავმჯდომარე გიორგი კვირიკაშვილმა წალენჯიხაში, მოსახლეობასთან შეხვედრისას გააკეთა.

პრემიერის თქმით, მოსახლეობის ღირსების დაცვა მმართველი გუნდის მთავარი მიზანი და მისიაა.

„გასული წლების განმავლობაში, წინა ხელისუფლების პერიოდში, ვუყურებდით სხვადასხვა ე.წ მოდერნიზაციას, მშენებლობას და სულ ვფიქრობდი, ჩემს თავს ვეკითხებოდი, ღირს კი ყველაფერი ეს იმად, რომ ჩვენ ვიხილოთ თუნდაც ერთი უსამართლოდ დაჩაგრული ადამიანი?! აღარაფერს ვიტყვი 300 ათას კაცზე. არა, მეგობრებო! პასუხი მქონდა ყოველთვის ერთი - არც ერთი უსამართლოდ დაჩაგრული ბავშვის ცრემლად არ ღირს არც ერთი ესტაკადა, არც ერთი ხიდი და არც ერთი გვირაბი. ჩვენ ისე ავაშენებთ, კიდევ უფრო ჩქარა, კიდევ უფრო ეფექტურად ჩვენს ქვეყანას, რომ საქართველოს მოსახლეობის ღირსებას შევინახავთ. ეს არის ჩვენი მთავარი კრედო, მთავარი მიზანი, მთავარი მისია და ამის გარშემო ვერთიანდებით, ყველა თქვენგანთან ერთად. დიდი მადლობა ამ მხარდაჭერისთვის. გაუმარჯოს, არა გათითოკაცებულ, არა გახლეჩილ, არამედ ერთიან ქართულ საზოგადოებას, ძლიერ საქართველოს, გაფერადებულს, აგუგუნებულს“, - განაცხადა გიორგი კვირიკაშვილმა.