"ამ ამბავზე ინტერპრეტაციები უცნაური და მიუღებელია"- არჩილ გეგეშიძე კრიტიკას გამოეხმაურა

პოლიტიკა - 10:37, 26 Jul, 2016

863

ამერიკის შეერთებულ შტატებში საქართველოს ელჩის არჩილ გეგეშიძის თქმით, ის გამონათქვამები, რომლის გამოც დიპლომატმა საზოგადოების კრიტიკა დაიმსახურა მედიის მიერ ინტერპრეტირებულია. ამის შესახებ გეგეშიძემ ჟურნალისტებთან დღეს“ამბასადორიალის“ მიმდინარეობისას ისაუბრა.

"ის ინტერპრეტაციები, რაც მიეცა ზოგადად მედიაში, საზოგადოებაში ამ ამბავთან დაკავშირებით შექმნილ ვითარებას, ეს ჩემთვის იყო უცნაური და მიუღებელი." - განაცხადა არჩილ გეგეშიძემ.

შეგახსენებთ, "ნეტგაზეთთან" ინტერვიუში არჩილ გეგეშიძემ რამდენიმე სკანდალური განცხადება გააკეთა: ელჩის თქმით მმართველ ძალაში პრორუსული ძალების მხარდამჭერი პოლიტიკოსები არსებობენ, რაც ხელისუფლებაში პლურალისტური მიდგომის არსებობას ადასტურებს. ასევე აღნიშნულ ინტერვიუში გეგეშიძემ საქართველოს ისტორიაში გეორგიევსკის ტრაქტატის მნიშვნელობასაც გაუსვა ხაზი და აღნიშნა, რომ წინაპრებმა ქვეყანა მოქნილობითა და დათმობებით გადაარჩინეს და რომ არა გეორგიევსკის ტრაქტატი „სპარსელებივით მუგუზალივით შავი წარბებები და თმები გვექნებოდა.“

მიუხედვად გეგეშიძის მიმართ გამოთქმული კრიტიკისა საგარეო საქმეთა სამინისტრო ელჩის გამოწვევას არ აპირებს. საგარეო უწყების ხელმძღვანელის მიხეილ ჯანელიძის თქმით გეგეშიძე თანამდებობაზე რჩება.