საკონსტიტუციო სასამართოს თავმჯდომარესა და საქართველოს პრეზიდენტს შორის შეხვედრა დასრულდა. შეხვედრის დასრულების შემდგომ პაპუაშვილმა ჟურნალისტებთან დეტალებზე ისაუბრა და განაცხადა, რომ იგი ასევე მზად არის შეხვდეს საქართველოს პრემიერ-მინისტრს, მთავარ პროკურორს კი ყველა საჭირო ინფორმაცია მიაწოდოს:

„მაშინ, როდესაც განვაცხადეთ ზოგადად ფაქტების შესახებ, მაშინ გამოვთქვი სურვილი და მზადყოფნა, რომ შევხვედროდი ქვეყნის პოლიტიკურ ხელმძღვანელობას, პრეზიდენტს და მადლობელი ვარ, რომ გამოინახა საშუალება, რომ შევხვედროდი. შემდგომ ჩვენ გვქონდა სატელეფონო საუბარი ჩემი თხოვნის საფუძველზე პრემიერ-მინისტრთან და მას ვუთხარი, რომ მე მზად ვიყავი შევხვედროდი და უფრო დეტალურად გვესაუბრა და პრემიერი დამპირდა, რომ უახლოეს დღეებში, როგორც კი იგი მოიცლიდა ამ წინასაარჩევნო კამპანიის ფარგლებში, დამიკავშირდებოდა, მეც მზადყოფნას გამოვთქვამ.

საუბარი გვქონდა დეტალურად იმ ფორმებზე, რა ფორმითაც ხორციელდება ზეწოლა მოსამართლეებზე, იმ შემაშფოთებელ ფაქტებზე, ასევე იმაზე, რომ ამდენი ხნის განმავლობაში რეაგირების გარეშე იყო ჩვენი მიმართვები, როგორც მთავარი პროკურატურისადმი, ასევე შინაგან საქმეთა სამინისტროსადმი, იმედი იმისა, რომ ადეკვატური რეაგირება იქნება არ არსებობს. სწორედ ამიტომ, მინდა პოლიტიკურმა ხელმძღვანელობამ გაიზიაროს ეს ინფორმაცია და ერთად მოვიფიქროთ, თუ როგორ შეიძლება ადეკვატური რეაგირება მოხდეს, გარანტია ჰქონდეს თითოეულ ჩვენთაგანს იმისა, რომ კი არ გაუარესდება მდგომარეობა, არამედ პირიქით, მოხდება შესაბამისი რეაგირება და სასამართლოს მიეცემა საშალება ნორმალურ ვითარებაში გააგრძელოს თავისი საქმიანობა. ამის შემდგომ შესაძლებელი იქნება იმის მოფიქრება, თუ როგორ შევხვდეთ მთავარ პროკურორს. მე არსად მისვლას არ ვაპირებ, თუ საჭირო იქნება ინფორმაციის მიწოდება, შევხვდები მტავარ პროკურორს“, - განაცხადა გიორგი პაპუაშვილმა ჟურნალისტებთან საუბრისას.