საკონსტიტუციო სასამართლოს თავმჯდომარის გიორგი პაპუაშვილის განცხადებას საქართველოს პრეზიდენტის საპარლამენტო მდივანი ანა დოლიძე კიდევ ერთხელ ეხმაურება. ანა დოლიძე მიიჩნევს, რომ მსგავს განცხადებებს პოლიტიკური თანამდებობის პირებმა ადეკვატური შეფასებებით უნდა უპასუხონ, რათა მოქალაქეებმა თავი დაცულად იგრძნონ:

„ჩვენ ველოდებით საქართველოს პრეზიდენტისა და საკონსტიტუციო სასამართლოს თავმჯდომარის პირისპირ შეხვედრას, რომლის შედეგადაც ალბათ უფრო დაწვრილებით გვეცოდინება თავმჯდომარის განცხადებების შესახებ, თუმცა, დღეს მნიშვნელოვანი ის არის, რომ მსგავსი ტიპის საკმაოდ შემაშფოთებელი განცხადება გააკეთა საქართველოს ერთ-ერთმა უმაღლესმა სახელმწიფო თანამდებობის პირმა, შესაბამისად ძალიან მნიშვნელოვანია სწორედ სახელმწიფო გადმოსახედიდან, რომ ჩვენ ყველამ ადეკვატური დამოკიდებულება დავგეგმოთ მსგავსი განცხადებების მიმართ, განსაკუთრებით იმ ფონზე და იმ ეპოქაში, რომ ასეთი განცხადებები ბევრი ადამიანის მხრიდან გაკეთებულა, სამწუხაროდ არ ვიცით რამდენად მოჰყვა მას ადეკვატური რეაქცია.

ამას შეიძლება მოჰყვეს ორმხრივი რეაქცია, შედარებით მარტივია სამართლებრივი მხარე თუ ყველა მონაწილე ორგანო თუ ინსტიტუტი ჩვენს კანონმდებლობას გულისყურით და ზედმიწევნით შეასრულებს, ეს განცხადება მიღებული უნდა იყოს როგორც შესაბამისი ინფორმაცია არის გამოძიების დაწყების საფუძველი, მაგრამ უფრო მნიშვნელოვანი არის პოლიტიკური მხარე იმ გაგებით, რომ სწორედ ჩვენი წარსულიდან გამომდინარე, იქიდან გამომდინარე, რომ ჩვენ ვაყალიბებთ ახალ სახელმწიფოებრივ კულტურას, მნიშვნელოვანია ცალსახა დაგმობა მსგავსი ტიპის ქმედებების. ძალიან მნიშვნელოვანია, რომ ჩვენმა პოლიტიკურმა ელიტამ სახელმწიფოებრიობის თვალსაზრისით შეხედოს ამ განცხადებებს და ასეთი დამოკიდებულება ყველა მოქალაქეს მისცემს იმის შეგრძენებას, რომ თვითონ იქნება დაცული“, - განაცხადა ანა დოლიძემ.