"რუსეთი აუცილებლობად არ მიიჩნევს ამ ეტაპზე საქართველოს ზომებით უპასუხოს"

"რუსეთი აუცილებლობად არ მიიჩნევს ამ ეტაპზე საქართველოს ზომებით უპასუხოს" - ალექსეი პუშკოვი

პოლიტიკა - 10:58, 22 Jul, 2016

3390

რუსეთი აუცილებლობად არ მიიჩნევს ამ ეტაპზე შესაბამისი ზომებით უპასუხოს საქართველოსა და სხვა ქვეყნებს, რომლებიც ევროკავშირის მიერ ყირიმის წინააღმდეგ დაწესებული სანქციების გახანგრძლივების გადაწყვეტილებას შეუერთდნენ. ამის შესახებ რუსეთის დუმის საერთაშორისო საკითხთა კომიტეტის თავმჯდომარემ ალექსეი პუშკოვმა "რია ნოვოსტისთან" ინტერვიუში განაცხადა.

"რუსეთი არ აღიქვამს ამ ნაბიჯს მეგობრულად, თუმცა ამავდროულად, აუცილებლობად არ მიიჩნევს, მოცემულ ეტაპზე ავტომატურად მიმართოს საპასუხო ზომებს" - განაცხადა რუსმა დეპუტატმა.

საქართველო, ალბანეთი, ლიხტენშტეინი, ნორვეგია და მონტენეგრო შეუერთდნენ ყირიმისა და სევასტოპოლის წინააღმდეგ სანქციების გახანგრძლივების შესახებ ევროკავშირის გადაწყვეტილებას.

პუშკოვის თქმით, საქართველოს და სხვა ქვეყნების გადაწყვეტილება ყირიმის წინააღმდეგ დაწესებულ სანქციებთან შეერთების შესახებ "მხოლოდ მწუხარებას იწვევს", თუმცა პრაქტიკული თვალსაზრისით ნახევარკუნძულის საქმიანობაზე ზეგავლენა არ აქვს.

"ეს, უპირველესად პროპაგანდისტული და პოლიტიკური ნაბიჯია, რომელიც ნაკარნახევია საქართველოს ხელისუფლების მისწრაფებით, აჩვენოს თავისი ერთობა დასავლეთთან, რომელიც ამ სანქციების ინიციატორია"- განაცხადა ალექსეი პუშკოვმა.

თუმცა, პუშკოვმა აღნიშნა, რომ რუსეთი მზად არის საქართველოსთან ურთიერთობის ეტაპობრივი ნორმალიზებისთვის.

"იქ არიან ძალები, რომლებიც ამით ასევე დაინტერესებულები არია - ეს მნიშვნელოვანია ქართული ეკონომიკისთვის, ასევე მნიშვნელოვანია ადამიანური ფაქტორის თვალსაზრისით" - განაცხადა პუშკოვმა.

დეპუტატმა იმედი გამოთქვა, რომ საქართველოში შემოდგომაზე დანიშნული საპარლამენტო არჩევნების შემდეგ შეიქმენა უკეთესი საფუძველი რუსულ-ქართული ურთიერთობების ნორმალიზებისთვის, მათ შორის პარლამენტთაშორისი კონტაქტებისთვის, რომლებიც პრაქტიკულად გაყინული აღმოჩნდა.

"ბოლო დროს საერთაშორისო პლატფორმებზე ქართველ დეპუტატებთან ურთიერთობებისას შეგვექმნა შთაბეჭდილება, რომ ჩვენი პარლამენტთაშორისი ურთიერთობების განახლების გარკვეული პოტენციალი არსებობს, რუსეთი ამისთვის მზად არის"- აღნიშნა დეპუტატმა.

მისი თქმით, დუმის საერთაშორისო საკითხთა კომიტეტი საქართველოს ევროკავშირის სანქციებთან შეერთებასთან დაკავშირებით რამე განცხადების მიღებას არ აპირებს, რადგან "საჭიროა ნაბიჯები, რომლებიც ურთიერთობებს აუმჯობესებს და არ აუარესებს"