ოპოზიცია მოსამართლეებზე ზეწოლას "რუსთავი 2"-ის საქმეს უკავშირებს, ხელისუფლება არგუმენტებს ითხოვს

პოლიტიკა - 10:16, 22 Jul, 2016

1297

საკონსტიტუციო სასამართლოს თავმჯდომარის გიორგი პაპუაშვილის განცხადება, რომლის მიხედვითაც, საკონსტიტუციო სასამართლოს მოსამართლეებზე ზეწოლა და შანტაჟი მიმდინარეობს უმრავლესობასა და ოპოზიციას შორის დაპირისპირების საგანად იქცა.

უმრავლესობაში ამბობენ, რომ პაპუასვილმა მოსამართლეებზე ზეწოლის კონკრეტული ფაქტები გამოძიებას უნდა დაუსახელოს.

„ზოგადი განცხადებით მსჯელობა და ზოგადი განცხადებებით, რომელიც არ შეიცავს კონკრეტიკას, შეუძლებელია დასკვნების გაკეთება. X მოსამართლეზე, X საქმეზე, უცნობი პირისგან გაურკვეველი სახელებით, ზეწოლებით მხოლოდ საუბარი საკმარისი ვერ არის,“-განაცხადა ეკა ბესელიამ.

რუსთავი 2-ს უკავშირებენ საკონსტიტუციო სასამართლოს თავმჯდომარის განცხადებებს ნაციონალურ მოძრაობაში.

„დარწმუნებული ვარ, რომ ხელისუფლების ერთ-ერთი მთავარი სატკივარი არის რუსთავი 2 და სწორედრუსთავი 2-ის გამო ხდება დაშინება, დაშანტაჟება ან რაღაც კეთილდღეობის შეპირება და სხვადასხვა მოქმედებები საკონსტიტუციოს მოსამართლეების მიმართ. იმიტომ, რომ ეს არის მათი მთავარი ამოცანა, რომ გააჩუმონ და ჩაახშონ რუსთავი 2,“-განაცხადა პეტრე ცისკარიშვილმა.

"რესპუბლიკური პარტია" კონკრეტული ადამიანების პასუხისმგებლობის აუცილებლობაზე საუბრობს.

„კარგია, რომ პროკურატურამ დღესვე მოახდინა ამასთან დაკავშირებით რეაგირება, მაგრამ ჩვენ აუცილებლად უნდა ვნახოთ შედეგი კონკრეტული ადამიანების პასუხისმგებლობის სახით. იმიტომ, რომ თუ საქართველოში იმუნიტეტის მქონე ადამიანები ვერ გრძნობენ თავს დაცულად, რა უნდა წარმოიდგინოს მაშინ რიგითმა მოქალაქემ და როგორ უნდა იგრძნოს თავი უსაფრთხოდ,“- განაცხადა რესპუბლიკური პარტიის წევრმა თამარ კორძაიამ.

გიორგი პაპუაშვილი უკვე ესაუბრა ტელეფონით პრეზიდენტსა და პრემიერს. სასამართლოს თავმჯდომარე მზადაა შეხვდეს საქართველოს მთავარ პროკურორსაც.