ედუარდ შევარდნაძის დაცვის წევრი თემურ ჯანაშია 1995 წლის 29 აგვისტოს განვითარებულ მოვლენებს დეტალურად იხსენებს. ჯანაშია იხსენებს აფეთქების მომენტს და საუბრობს თუ როგორ მოხდა ტერაქტის ორგანიზება.

ჯანაშიას განცხადებით ტერაქტის ღამეს იგორ გიორგაძე თბილისიდან მოსკოვში გაფრინდა:

„დღესაც ჩანს ის ფრაგმენტები რაც აფეთქების შემდეგ კედელს მოხვდა. ამ აფეთქების შედეგად დაზიანდნენ დაცვის თანამშრომლები, მე მაგ დროც ცოტა გამიმართლა, წინა მანქანაში ვიყავი, ცოტა მოშორებით აფეთქებიდან, თავად პრეზიდენტის ევაკუაციაში მივიღე მონაწილეობა და გადავიყვანეთ რესპუბლიკურ საავადმყოფოში. გამოძიება დაიწყო, როგორც ვიცი ხალხმა სასჯელი მოიხადა, რაც შეეხება თავად გიორგაძეს ასე ვთქვათ უკანა კარიდან გაიქცა, საქართველოს უშიშროების მინისტრი მოსკოვში გაფრინდა და 21 წელიწადია ფაქტობრივად რუსეთის ტერიტორიას ვერ ტოვებს. ზოგიერთ პოლიტიკოსს იმ შეფასებაში ვეთანხმები, რომ არაჩვეულებრივი კაცია, რადგან 21 წელიწადია დაუსჯელად დადის და ასე აპირებს ეს კაცი ცხოვრებას. გამოძიების შემდეგ დადგინდა, რომ ტერაქტის ორგანიზატორი იყო იგორ გიორგაძე, ამასთან ერთად თვითონ უშიშროების ქვედანაყოფები იღებდნენ მონაწილეობას, ეს არ არის ადეკვატური მოქმედება ხელისუფლების, რომელიც მომართულია იმისთვის, რომ ქვეყანაში იყოს კანონის უზენაესობა და წესრიგი, ეს ემსახურება იმას, რომ საქართველოში განვითარდეს რუსული სცენარი, შემოვიდეს რუსული ჯარი და დამყარდეს ტოტალიტარული რეჟიმი“, - აცხადებს ჯანაშია.