"თურქეთის ელჩის უწყებაში მისვლა არანაირად არ უკავშირდება თურქეთის გენერალური კონსულის გაკეთებულ განცხადებას"- განათლების სამინისტრო

პოლიტიკა - 14:59, 21 Jul, 2016

1347

სკანდალური განცხადებების შემდეგ თურქეთის ელჩი საქართველოში ზაქი ლევენთ გუმრუქჩუ დღეს განათლების სამინისტროში იმყოფებოდა. ელჩს მედიის წარმომადგენლებთან კომენტარი არ გაუკეთებია.
საქართველოს განათლებისა და მეცნიერების სამინიტროში აცხადებენ, რომ ელჩის სამინისტროში ვიზიტი ტენდერის ფარგლებში საგანმანათლებლო დაწესებულებებში თურქული კომპანიების მიერ მიმდინარე სარეაბილიტაციო სამშენებლო სამუშაოებს უკავშირდება და არანაირად არ უკავშირდება ფეთჰულა გიულენთან დაკავშირებული საგანმანათლებლო დაწესებულებების შესახებ საქართველოში თურქეთის გენერალური კონსულის იასინ თემისქანის მიერ გაკეთებულ განცხადებას.
უწყების ცნობით, თურქეთის ელჩი განათლებისა და მეცნიერების მინისტრის პირველ მოადგილეს ქეთევან ნატრიაშვილს შეხვდა.
თურქეთში მომხდარ სამხედრო გადატრიალების მცდელობასთან დაკავშირებით თურქეთის გენერალურმა კონსულმა იასინ თემისქანმა მედიას კომანტარი მისცა და გადატრიალების მცდელობის უკან ფეტჰულა გიულენის კვალზე ისაუბრა. ამავე კონტექტტში საუბრისას მან თქვა, რომ „ეს ხალხი იმაგრებს საკუთარ პოზიციებს სკოლების მეშვეობით, ანუ ზრდიან თაობებს, რომლებიც არა სახელმწიფოს, არამედ ტერორისტულ დაჯგუფებებს ემსახურებიან. სამწუხაროდ, აჭარაში არის მსგავსი სკოლები. ერთ-ერთია რეფაიდინ შაჰინის სკოლა-ლიცეუმი",
კონსულის აღნიშნულ განცხადებას საქართველოში აჟიოტაჟი მოჰყვა, რასთან დაკავშირებითაც, მოგვიანებით, თურქეთის ელჩმა განმარტება გააკეთა და აღნიშნა, რომ კონსულის კომენტარი მედიაში არასწორი ინტერპრეტაციით გავრცელდა.