რუსეთის დუმა ქართული ღვინისა და "ბორჯომის" იმპორტის აკრძალვის ინიციატივით გამოდის

პოლიტიკა - 11:10, 21 Jul, 2016

13236

რუსეთის დუმა ქართული ღვინისა და "ბორჯომის" იმპორტის აკრძალვის ინიციატივით გამოდის .
რუსეთის სახელმწიფო დუმის კომიტეტი საგარეო საქმეთა საკითხებში განცხადებას ამზადებს, რომლითაც დაგმობს საქართველოს, ალბანეთის, ლიხტენშტეინის, ნორვეგიისა და მონტენეგრის გადაწყვეტილებას, შეუერთდნენ ყირიმისა და სევასტოპოლის წინააღმდეგ სანქციების გახანგრძლივების შესახებ ევროკავშირის გადაწყვეტილებას.

უფრო კონკრეტულად ყურადღება გამახვილდება ქართული ღვინისა და მინერალური წყლის ბორჯომის იმპორტის აკრძალვაზე.

ამის შესახებ კომიტეტის წევრმა იან ზელენსკიმ განაცხაა.

„ჩვენ ვალდებულები ვართ რეაგირება მოვახდინოთ. ამავდროულად, ბუნებრივია, მთავრობას ვურჩევთ ანალოგიურ ზომებს მიმართონ“ - განაცხადა დეპუტატმა.

მისი თქმით, იმ ქვეყნების მთავრობებმა, რომლებიც სანქციებს შეუერთდნენ „სისულელე“ ჩაიდინეს, რადგან საპასუხო რუსული ზომებისგან გაცილებით უფრო მეტად დაზარალდებიან.

როგორც ჩანს ეს ყველაზე მეტად ქართულ ღვინოსა და ბორჯომს ეხება.

„მათი ღვინის გარეშე გავძლებთ, მინერალური წყლის გარეშეც. ჩვენ უამრავი საკუთარი რესურსი გვაქვს. უნდა განვავითაროთ ყირიმი - ღვინო, ტურიზმი. გვექნება კარგი ღვინო, ქიმიკატების გარეშე, განსხვავებით ქართული ღვინისგან“ - განაცხადა დეპუტატმა.

როგორც გუშინ გახდა ცნობილი, საქართველო შეუერთდა ევროკავშირის გადაწყვეტილებას, გაახანგრძლივოს სანქციები ყირიმისა და სევასტოპოლის წინააღმდეგ 2017 წლის 23 ივნისამდე.

სანქციები ყირიმსა და სევასტოპოლის წინააღმდეგ პირველად 2014 წლის ივნისში დაწესდა.