პაატა ბურჭულაძემ წყალტუბოსა და გეგუთში ამომრჩეველთან შეხვედრა გამართა

პოლიტიკა - 17:22, 19 Jul, 2016

1548

პაატა ბურჭულაძე რეგიონებში მოსახლეობასთან შეხვედრებს განაგრძობს. „მოძრაობა სახელმწიფო ხალხისთვის“ თავმჯდომარემ შეხვედრები წყალტუბოში და გეგუთში გამართა. ბურჭულაძემ და პარტიის ლიდერებმა ადგილობრივებს საარჩევნო პროგრამა და პარტიის ეკონომიკური ხედვა გააცნეს, რომლის ერთ-ერთი მთავარი პრიორიტეტი ქვეყნის სწრაფი ეკონომიკური ზრდაა. ბურჭულაძემ ადგილობრივებს საარჩევნო პროგრამის სოციალური ნაწილიც გააცნო, რომლის მიხედვითაც პენსია 250 ლარამდე გაიზრდება, სოციალურად დაუცველ მოსახლეობას კი სტატუსი 4 წლის განმავლობაში გარანტირებულად შეუნარჩუნდებათ. პაატა ბურჭულაძემ ასევე წყალტუბოს ტურისტული ინფრასტრუქტურის განვითარების აუცილებლობაზეც ისაუბრა. დღესვე ბურჭულაძემ წყალტუბოში „მოძრაობა სახელმწიფო ხალხისთვის“ რეგიონული ოფისიც გახსნა.

„ვაგრძელებთ რეგიონებში მოსახლეობასთან შეხვედრებს. სურათი მთელს ქვეყანაში თითქმის ერთნაირია, მძიმე სოციალურ-ეკონომიკური ფონი და სრული უიმედობა ხალხში. ხალხსა და ხელისუფლებას შორის დიდი სიცარიელეა. ასე გაგრძელება აღარ შეიძლება და ჩვენ ამ მძიმე რეალობას 8 ოქტომბერს აუცილებლად შევცვლით. რაც მთავარია ჩვენ მოსახლეობას გავუჩინეთ იმედი, რომ ყველაფერი უკეთესობისკენ შეიცვლება. წყალტუბოს აქვს დიდი ტურისტული პოტენციალი და არჩევნების დასრულების შემდეგ ჩვენ დავიწყებთ ტურისტული ინფრასტრუქტურის განვითარებას. ვუზრუნველყოფთ ტურისტულ სფეროში ჩართული ადგილობრივი პერსონალის კვალიფიკაციის ამაღლებას და ისევე როგორც მთელს ქვეყანაში ასევე წყალტუბოსა და გეგუთშიც შევძლებთ წარმატებით განვავითაროთ აგრო სექტორი და სოფლის მეურნეობა. „ - განაცხადა პაატა ბურჭულაძემ.