"მოცეკვავეთა ანსამბლთან საკონსულო მუშაობს და დახმარებას აღმოუჩენენ"

"მოცეკვავეთა ანსამბლთან საკონსულო მუშაობს და დახმარებას აღმოუჩენენ" - საქართველოს ელჩი თურქეთში

პოლიტიკა - 11:12, 16 Jul, 2016

1337

სტამბოლში საქართველოს გენერალური კონსულის, ირაკლი ასაშვილის ინფორმაციით, საკონსულოს საქართველოს მოქალაქეებთან მუდმივი კავშირი აქვთ, მოქმედებს ცხელი ხაზიც.

ასაშვილის განცხადებით, საქართველოს მოქალაქეები ათათურქის საერთაშორისო აეროპორტში იმყოფებიან, რომლებიც საქართველოში ვერ გამოფრინდნენ.

"დაახლოებით, ერთი საათის წინ საკონსულოს ორმა თანამშრომელმა აეროპორტში შეაღწია და ისინი მოქალაქეებთან იმყოფებიან"- თქვა კონსულმა.

საქართველოს ელჩმა თურქეთში ირაკლი კოპლატაძემ კი თურქეთში არსებული ვითარება შეაფასა და თურქეთში ჩარჩენილ ცეკვის ანსამბლის მდგომარეობაზე ისაუბრა.

კოპლატაძის განცხადებით, თურქეთის ხელისუფლების პირველი პირების თქმით, ისინი სრულიად აკონტროლებენ სიტუაციას.

"პრეზიდენტი და მთავრობა აცხადებს, რომ ჩაიშალა სამხედრო ამბოხი, რომელივ გუშინ განხორციელდა და რომელსაც 90 ადამიანის სიცოცხლე შეეწირა. თურქეთში მეამბოხეების ჩასახშობად გარკვეული ლოკალური ოპერაციები კვლავ მიმდინარეობს"- აღნიშნა ელჩმა.

რაც შეეხება საქართველოში მყოფ ქართველებს კოპლატაძის განცხადებით, ცხელ ხაზზე 1 000 - ზე მეტი ზარი შევიდა თუმცა ეს იყო შეკითხვები და არა დაზარალებულთა შესახებ ინფორმაცია.

ელჩის განცხადებითვე, ათათურქის აეროპორტში მყოფი ქართველები პირველივე რეისით დატოვებენ ტერიტორიას, საელჩოს და საკონსულოს მათთან მუდმივი კონტაქტი აქვს.

ირაკლი კოპლატაძის განცხადებით, ანსამბლ "ქართული გენის" წევრებთან საკონსულო მუშაობს.

"აეროპორტიდან საკონსულოს წევრები, მივლენ ანსამბლის წევრებთან და აღმოუჩენენ ყველა საჭირო დახმარებას. პრობლემას ართულებს ის რომ სტამბოლის ორივე ხიდი შეზღუდულად მუშაობს, თუმცა გენ.საკონსულო მათთან აქტიურ კონტაქტზე იმყოფება"- აღნიშნა თურქეთში საქართველოს ელჩმა.

60 ბავშვი და პედაგოგები, რომლებიც ბულგარეთიდან საქართველოსკენ მოემართებოდნენ სტამბულთან ქუჩაში არიან გაჭედილები. მშობლები მოუწოდებენ ხელისუფლებას კონტროლზე აიყვანონ ქართულ გენთან დაკავშირებით შექმნილი ვითარება.

მათ დღეს საქართველოს საგარეო საქმეთა სამინისტროსთან აქციაც გამართეს.

ბოლო ინფორმაციით, თურქეთში ვითარება კვლავ მძიმეა, თუმცა სიტუაციას ხელისუფლება აკონტროლებს.

ქვეყანაში კომენდანტის საათი და სამხედრო მდგომარეობა მოქმედებს.

სამხედრო გადატრიალების მცდელობის გამო გადააყენეს 5 გენერალი და 29 პოლკოვნიკი. მომხდარის გამო რამდენიმე საათით შეჩერებული იყო სტამბოლში ათათურქის აეროპორტის მუშაობა. ამჟამად აეროპორტს ქვეყნის არმია აკონტროლებს.