პრემიერი საქართველოს მოქალაქეებს თურქეთის მიმართულებით გადაადგილებისგან თავის შეკავებას ურჩევს

პოლიტიკა - 10:15, 16 Jul, 2016

2108

საქართველოს პრემიერ–მინისტრმა გიორგი კვირიკაშვილმა უშიშროების საბჭოს სხდომის დასრულების შემდეგ განაცხადა, რომ „უშიშროების საბჭოს სხდომაზე იმსჯელეს იმ საფრთხეებზე, რაც შესაძლოა საქართველოსთვის ამ სიტუაციიდან მომდინარეობდეს".

"ძალიან მნიშვნელოვანია ჩვენს მეგობარ თურქეთში დემოკრატიულ განვითარებას საფრთხე არ შეექმნას, ასევე ძალიან მნიშვნელოვანია საფრთხე არ შეექმნას დემოკრატიულად არჩეულ ხელისუფლებას. ჩვენ ასევე ვისაუბრეთ საზღვრებზე არსებულ სიტუაციაზე და გავაანალიზეთ სუს-ისა და შსს-ს მიერ მოწოდებული ინფორმაცია. დილამდე დავაკვირდებით სიტუაციას. ჩვენივე მოქალაქეების უსაფრთხოებიდან გამომდინარე, საზღვარზე გადასვლა შევზღუდეთ თურქეთის მიმართულებით, საჰაერო საზღვარი კი ამ დროისთვის ჩაკეტილია, ფრენები არ ხორციელდება. დილის სიტუაციიდან გამომდინარე მოვახდენთ საზღვართან დაკავშირებულ ცვლილებას", – განადხადა გიორგი კვირიკაშვილმა.

საქართველოს პრემიერ–მინისტრი საქართველოს მოქალაქეებს ურჩვენს, რომ ვიდრე თურქეთში სიტუაცია არ დასტაბილურდება, თავი შეიკავონ თურქეთის მიმართულებით მგზავრობაზე.

კვირიკაშვილის ინფორმაციით, ევროინტეგრაციის თემაზე ბათუმში გამართული საერთაშორისო კონფერენციის 30-მდე მონაწილე თურქეთში მიმდინარე მოვლენების გამო, სამშობლოში დაბრუნებას ვერ ახერხებს.

სხდომას პრემიერ-მინისტრი, პრეზიდენტი, უშიშროების საბჭოს თავმჯდომარე, შს მინსტრი, პარლამენტის თავმჯდომარე და გენ შტაბის უფროსი დაესწრნენ.