"მათ გვერდით ვდგავართ, ვგრძნობთ და ვიზიარებთ ამ ტკივილს"- პრეზიდენტი ფრანგ ხალხს უსამძიმრებს

პოლიტიკა - 14:12, 15 Jul, 2016

1151

საქართველოს პრეზიდენტი გიორგი მარგველაშვილი ნიცაში მომხდარი ტერორისტული აქტის გამო მწუხარებას გამოთქვამს და ფრანგ ხალხს უსამძიმრებს.
პრეზიდენტმა განცხადება ბათუმში გააკეთა და აღნიშნა, რომ საქართველოს უშიშროების სამსახურები ეფექტურად მუშაობენ ქვეყანაში უსაფრთხოების დაცვის კუთხით.
"ქართველი ხალხის სახელით მინდა მივუსამძიმრო ფრანგ ხალხს, მათ გვერდით ვდგავართ, ვგრძნობთ და ვიზიარებთ მათ ტკივილს. რაც შეეხება იმ პოცესს, რასაც ჰქვია გლობალური უსაფრთხოება და საქართველოს როლი. საქართველომ ძალიან ბევრი გააკეთა ამისთვის, ქართველი ჯარისკაცები ბატონები და ქალბატონები, რომლებიც მსახურობენ ცხელ წერტილებში ამისთვის თავის სიცოცხლეს დებენ"- აღნიშნა პრეზიდენტმა და მადლობა გადაუხადა ქართველ ჯარისკაცებს.
გიორგი მარგველაშვილმა ნიცაში მომხდარი ტერორისტული აქტის შეფასებისას აღნიშნა, რომ "ყველანი ძალიან ფრთხილად უნდა ვიყოთ".
"ბუნებრივია, უნდა ამაღლდეს უსაფრთხოების ზომები და საზოგადოება უნდა იყოს დეტალურად ინფორმირებული რა ვითარებაში როგორ მოიქცეს. სამართალდამცველებიც აქტიურად უნდა იყვნენ ჩართული. საქართველო ამ თვალსაზრისით არის სახელმწიფო, რომლის უშიშროების სამსახურები ძალიან ეფექტურად მუშაობენ ამ მიმართულებით და დარწმუნებული ვარ მომავალშიც გაგრძელდება ეფექტური მუშაობა“ - განაცხადა საქართველოს პრეზიდენტმა.

შეგახსენებთ, ტერაქტი ნიცაში გვიან ღამით მოხდა. ბასტილიის აღების დღის აღსანიშნავ დღესასწაულზე შეკრებილ ადამიანთა შორის, რომლებიც ფოიერვერკებს უყურებდნენ, სატვირთო ავტომობილი შევარდა.

თავდამსხმელმა ხალხის მისამართით გასროლაც მოასწრო. სატვირთოს მძღოლი პოლიციამ ადგილზე მოკლა. მისი ავტომობილიდან კი ამოღებულია იარაღი და ხელყუმბარები.

ამჟამინდელი მონაცემებით დაღუპულია 84 , ხოლო დაშავებულია 100-მდე ადამიანი.

პანიკისა და შეჯახების შემდეგ ინტერნეტში თვითმხილველების მიერ გადაღებული სისხლიანი კადრები გავრცელდა.

პენტაგონმა კი "ისლამური სახელმწიფოს" ერთ-ერთი ლიდერის თარხან ბათირაშვილის, იგივე ომარ ალ შიშანის გარდაცვალება ოფიციალურად დაადასტურა.

პენტაგონის პრესმდივნის პიტერ კუკის ინფორმაციით, ბათირაშვილი 10 ივლისს კოალიციის ავია იერიშებს ერაყის შირკატის რაიონში ემსხვერპლა.