პაატა ბურჭულაძის მოძრაობამ კამპანია “თავისუფალი სასამართლო ხალხს” ხელმოწერების შეგროვება დაიწყო

პოლიტიკა - 12:57, 15 Jul, 2016

1179

“თავისუფალი სასამართლო ხალხს” კამპანიის ფარგლებში პაატა ბურჭულაძის მოძრაობამ სასამართლო სისტემის რეფორმირებისთვის მომზადებული საკანონმდებლო ინიციატივის მხარდასაჭერად ხელმოწერების შეგროვება დაიწყო. საკანონმდებლო ინიციატივა ითვალისწინებს იუსტიციის უმაღლესი საბჭოს მოქმედი შემადგენლობის დათხოვნას და საბჭოს ახალი შემადგენლობის არჩევას, ასევე იცვლება მოსამართლეთა დისციპლინური პასუხისმგებლობის საფუძვლები და პროცედურა. კამპანია „თავისუფალი სასამართლო ხალხს“ ფარგლებში ინიციატივის მხარდასაჭერი ხელმოწერების შეგროვება მთელი ქვეყნის მასშტაბით გაგრძელდება.

“იუსტიციის უმაღლეს საბჭოს მართავს სრული უკანონობა და ჩაწყობა, გუშინ გამართულმა კენჭისყრამ კიდევ ერთხელ ჩამოხსნა ნიღაბი იუსტიციის უმაღლეს საბჭოს რომელმაც კიდევ ერთხელ გამოუტანა განაჩენი საკუთარ თავს, გუშინდელი დღე იყო სასამართლოს წინასაარჩევნო შემზადება იმისთვის, რომ გათეთრდეს ის უკანონობები რომელსაც ექნება ადგილი არჩევნების განმავლობაში, ამიტომ ჩვენ ვიწყებთ კამპანიას თავისუფალი სასამართლო ხალხს, მთელი საქართველოს მასშტაბით. მისი მიზანია შეგროვდეს 30 000 ხელმოწერა იმისათვის, რომ ერთხელ და სამუდამოდ წერტილი დაესვას იმ უკანონობას რომელსაც ადგილი აქვს სასამართლო ხელისუფლებაში. არავითარი აზრი არჩევნების ჩატარებას არა აქვს ამ სასამართლოს პირობებში. პარლამენტმა უკვე დაარეგისტრირა საინიციატივო ჯგუფი. ჩვენ თვის ბოლომდე უნდა შევაგროვოთ ეს ხელმოწერები რის შემდეგაც მივმართავთ პარლამენტის თავმჯდომარეს და პრეზიდენტს რიგგარეშე სხდომის მოწვევის ინიციატივით. კანონპროექტი მიზნად ისახავს რადიკალური ცვლილებების გატარებას იუსტიციის უმაღლეს საბჭოში და საერთოდ სასამართლოებში და ერთ-ერთი მათ შორის არის ის რომ იუსტიციის უმაღლეს საბჭოს ამჟამინდელი შემადგენლობა უნდა იქნეს დათხოვნილი და ახალი პრინციპების საფუძველზე უნდა მოხდეს ახალი შემადგენლობის არჩევა.” განაცხადადავით ჯანდიერმა.