უმძიმეს წუთებში, სოლიდარობას და მხარდაჭერას ვუცხადებთ ფრანგ ხალხს და ხელისუფლებას

უმძიმეს წუთებში, სოლიდარობას და მხარდაჭერას ვუცხადებთ ფრანგ ხალხს და ხელისუფლებას - საქართველოს საგარეო საქმეთა სამინისტრო

პოლიტიკა - 11:55, 15 Jul, 2016

1329

საქართველოს საგარეო საქმეთა სამინისტრო საფრანგეთში მომხდარ თავდასხმასთან დაკავშირებით განცხადებას ავრცელებს.

"საქართველოს საგარეო საქმეთა სამინისტრო მკაცრად გმობს 2016 წლის 14 ივლისს, საფრანგეთის რესპუბლიკის ეროვნული დღესასწაულის - „ბასტილიის აღების დღეს“, ქალაქ ნიცაში მშვიდობიანმოსახლეობაზე მომხდარ თავდასხმას, რომელსაც ათეულობით ადამიანის სიცოცხლე ემსხვერპლა.

შეძრწუნებულნი ვართ განხორციელებული ბარბაროსული თავდასხმის შედეგად დატრიალებული ტრაგედიის გამო და ამ უმძიმეს წუთებში, სოლიდარობას და მხარდაჭერას ვუცხადებთ ფრანგ ხალხსა და ხელისუფლებას.

საქართველო მკაცრად გმობს მომხდარ ფაქტს. მიგვაჩნია, რომ აღნიშნული თავდასხმა წარმოადგენს სასტიკ გლობალურ დანაშაულს და მიმართულია მსოფლიოში მშვიდობის წინააღმდეგ.

საგარეო საქმეთა სამინისტრო უსამძიმრებს დაღუპულთა ოჯახებს, თავდასხმის შედეგად დაშავებულებს კი უსურვებს სწრაფ გამოჯანმრთელებას"- აღნიშნულია უწყების მიერ გავრცელებულ განცხადებაში.

14 ივლისს ნიცაში სანაპიროზე სატვირთო მანქანა ხალხმრავალ ადგილას შეიჭრა. იყო სროლაც.

საფრანგეთის შინაგან საქმეთა სამინისტროსინფორმაციით, ტერაქტის შედეგად დაღუპულთა რაოდენობა 84-მდე გაიზარდა, 18 ადამიანი კი კრიტიკული მდგომარეობაშია. დაღუპულთა შორის არიან ბავშვებიც.

საქართველოს მოქალაქეების საყურადღებოდ!

საფრანგეთში, ქალაქ ნიცაში მომხდარ ტერორისტულ აქტთან დაკავშირებით, საქართველოს საელჩოში მოქმედებს ცხელი ხაზი: +33 7 83 31 86 89 საქართველოს საგარეო საქმეთა სამინისტრო საფრანგეთში მყოფ საქართველოს მოქალაქეებს მოუწოდებს თავი შეიკავონ ხალხმრავალ ადგილებში გადაადგილებისაგან და დამატებითი ინფორმაციის მისაღებად დაუკავშირდნენ საქართველოს საელჩოს ცხელ ხაზს.

ცხელი ხაზი ფუნქციონირებს ასევე საქართველოს საგარეო საქმეთა სამინისტროში 09:00-დან 18:00 საათამდე - (+995 32) 294 50 50; 24 საათის განმავლობაში - (+995) 577 98 40 20;

ამ ეტაპზე ფრანგული მხარე დაღუპულთა და დაშავებულთა შორის საქართველოს მოქალაქეების არსებობას არ ადასტურებს.