2016 წლის 14 ივლისს, აშშ-ის კონგრესის საგარეო ურთიერთობათა კომიტეტმა საქართველოს ტერიტორიული მთლიანობის მხარდამჭერი ორპარტიული რეზოლუცია (H.Res. 660) მიიღო.

მომდევნო ეტაპზე რეზოლუციას კენჭს უყრიან 2016 წლის შემოდგომაზე დაგეგმილ კონგრესის პლენარულ სხდომაზე, სადაც კონგრესმენთა უმრავლესობის მხრიდან მხარდაჭერის შემთხვევაში, რეზოლუცია საბოლოო სახით დამტკიცდება.

აღნიშნულს აფასებს საქართველოს საგარეო საქმეთა მინისტრი მიხეილ ჯანელიძე. საგარეო უწყების ხელმძღვანელის განცხადებით, აღნიშნული რეზოლუცია გულისხმობს იმას, რომ ამერიკის შეერთებული შტატები მტკიცედ უჭერს მხარს საქართველოს ტერიტორიულ მთლიანობას:

„მინდა მივესალმო იმ რეზოლუციას, რომელიც მიღებული იქნა კონგრესის მიერ. ეს არის კიდევ ერთხელ გამოხატული ცალსახა მხარდაჭერა საქართველოს ტერიტორიული მთლიანობისადმი. აღნიშნული რეზოლუცია ხაზს უსვამს, რომ ეს პოლიტიკა უნდა იყოს შეუქცევადი და ამერიკის შეერთებულმა შტატებმა, საქართველოს ტერიტორიული მთლიანობის მტკიცე მხარდაჭერა უნდა გააგრძელოს მანამდე, სანამ არ აღდგება ტერიტორიული მთლიანობა. ეს არის ძალიან მნიშვნელოვანი გზავნილი ამერიკის საკანონმდებლო ორგანოდან და ხაზს უსვამს, რომ ერთიანია ამერიკის პოლიტიკა, როგორც აღმასრულებელი ხელისუფლების, ასევე საკანონმდებლო ორგანოსი“, - განაცხადა მიხეილ ჯანელიძემ.