ირაკლი ალასანიამ ქარელში მაჟორიტარი დეპუტატობის კანდიდატი წარადგინა და მოსხლეობის პრობლემებს გაეცნო

პოლიტიკა - 15:47, 14 Jul, 2016

1454

„თავისუფალი დემოკრატების“ ლიდერი ირაკლი ალასანია ქარელში ადგილობრივ მოსახლეობას შეხვდა და რაიონის მაჟორიტარი დეპუტატობის კანდიდატი - ალექსანდრე მსხალაძე წარუდგინა. ირაკლი ალასანიამ ალექსანდრე მსხალაძესთან ერთად ადგილობრივებისგან პირადად მოისმინა რაიონში არსებული პრობლემები. პარტიის ლიდერმა მოსახლეობას ‘’თავისუფალი დემოკრატების’’ საარჩევნო პროგრამა გააცნო და განსაკუთრებული ყურადღება გაამახვილა პროგრამის სოციალურ-ეკონომიკურ ნაწილზე. ირაკლი ალასანიამ დეტალურად ისაუბრა ეკონომიკური განვითარების გეგმაზე, რომელიც ადამიანებს საკუთარი შესაძლებლობების რეალიზების საშუალებას მისცემს ქვეყნის სხვადასხვა რაიონში. ‘’თავისუფალი დემოკრატების’’ ლიდერმა ყურადღება გაამახვილა პროდუქციის რეალიზაციის, დასაქმების, ჯანდაცვისა და განათლების საკითხებზე. შეხვედრაზე მაჟორიტარი დეპუტატობის კანდიდატმა ალექსანდრე მსხალაძემ ადგილობრივების პრობლემებზე ისაუბრა და რაიონში არსებული მძიმე მდგომარეობიდან გამოყვანის გეგმა წარადგინა. ალექსანდრე მსხალაძეს მჭიდრო ურთიერთობა აქვს ქარელის მოსახლეობასთან და განსაკუთრებით გვერდით უდგას ახალგაზრდებს. შეხვედრაზე მსხალაძემ ყურადრება გაამახვილა ახალგაზრდების განათლების და დასაქმების პრობლემაზე. მისი თქმით, რაიონში ხელმიუწვდომელია განათლება, არ არსებობს მოტივაცია იმისთვის რომ მათი დასაქმება დაკავშირებული იყოს საკუთარ რაიონთან. შეხვედრის დასრულების შემდეგ „თავისუფალი დემოკრატების“ ლიდერმა ირაკლი ალასანიამ ვარძელაშვილის ქუჩაზე პარტიის რაიონული ოფისი გახსნა. ოფისის გახსნას პარტიის რაიონული ორგანიზაციის წევრები, მხარდამჭერები და რიგითი მოქალაქეები ესწრებოდნენ. პარტიის ლიდერმა შეკრებილებს სიტყვით მიმართა და პარტიის სამომავლო გეგმები გააცნო. მოგვიანებით ირაკლი ალასანიამ ალექსანდრე მსხალაძესთან ერთად ქალაქის ცენტრალური ქუჩები მოინახულა. იმყოფებოდნენ ქარელის ცენტრში არსებულ ბაზარში, სადაც მოვაჭრეებს შეხვდნენ. მოვაჭრეები მძიმე სოციალურ პირობებში იმყოფებიან. ბაზარში შემცირებულია მყიდველთა რაოდენობა, მათი გადასახადები კი საკმაოდ დიდია. ‘’თავისუფალი დემოკრატების’’ ლიდერმა მათ პარტიის ეკონომიკური ხედვა გააცნო და მათი პრობლემების გადაჭრის გზებზე ისაუბრა. ''ჩვენს მხარადამჭერებს გავაცანით ჩვენი გუნდის საპენსიო პოლიტიკა, რომელიც არაერთხელ გავარჩიეთ და ვთქვით, რომ 300 ლარამდე გაიზრდება მოქალაქეების პენსია და მინიმალური ხელფასი არ იქნება 500 ლარზე ნაკლები, რაც ეკონომიკურ ანალიზზე დაყრდნობით არის გამოთვლილი. ამ გეგმების რეალიზაციას სათავეში ჩაუდგება სანდრო, როდესაც გახდება დეპუტატი. ხელისუფლება გვჭირდება სწორედ იმისათვის, რომ ხალხს შევუმსუბუქოთ ის დიდი ტვირთი, რომელიც ოჯახში ლუკმა პურის მიტანას გულისხმობს. სწორედ ამიტომ მოვედით პოლიტიკაში და სანდროც ამიტომ შემოგვიერთდა „თავისუფალ დემოკარტებს“. დიდი მადლობა მას ამ გადაწყვეტილებისთვის’’, - განაცხადა ირაკლი ალასანიამ. ‘’ჩემი რაიონის მოსახლეობა მხარს უჭერს ‘’თავისუფალ დემოკრატების’’ გუნდს და ირაკლი ალასანიას. ჩვენ ხალხს სჯერა ბატონი ირაკლის და მისი გუნდის გეგმების, მისწრაფებების. დღეს შედგა ჩვენი შეხვედრა გუნდის ლიდერთან და ეს არის მნიშვნელოვანი, რადგან დღეიდან ვიწყებთ ერთობლივად დასახული გეგმების განხორციელებას. ჩვენ გავხდით ქარელის მოსახლეობის ცხოვრებას უკეთეს. არ გვინდა მტრობა, ჩვენ მშვიდობით მოვალთ ხელისუფლებაში ერთ მუშტად შეკრულნი და საქმეზე ორიენტირებულნი. ახალგაზრდებთან და უფროსი თაობის ადამიანებთან ერთად შევქმნით ისეთ გუნდს, რომელიც ქარელის რაიონს წარმატებას მოუტანს. მე ამაში დარწმუნებული ვარ და ჩვენ, ბატონ ირაკლისთან ერთად ქარელში შევქმნით უკეთეს ეკონომიკას და ცხოვრებას’’, - განაცხადა ალექსანდრე მსხალაძემ.