შავი ზღვის მნიშვნელობა NATO-სთვის და საქართველოს როლი - პრეზიდენტმა სამიტის კომუნიკე შეაფასა

პოლიტიკა - 19:23, 09 Jul, 2016

1677

გიორგი მარგველაშვილმა ჟურნალისტების შეკითხვებსაც უპასუხა და ვარშავის სამიტზე მიღებული კომუნიკეც შეაფასა. როგორც ქვეყნის პირველმა პირმა აღნიშნა, ნატო არის პირველ რიგში ღირებულებითი კავშირი. ქვეყნები, რომლებიც გაერთიანებული არიან ნატოში და ქვეყნები რომლებიც ესწრაფვიან ნატოში გაერთიანებას, ერთიანდებიან არამარტო სამხედრო დაცულობის თვალსაზრისით, არამედ იმ ღირებულებების ირგვლივ, როგორიც არის დემოკრატია და პიროვნული თავისუფლებები.

"ამ თვასაზრისით არჩევნები ბუნებრივია არის უმნიშვნელოვანესი ნაბიჯი ჩვენი ქვეყნის დემოკრატიულობის განმტკიცების თვალსაზრისით. ნატოს პოზიცია მდგომარეობს იმაში, რომ ისინი დარწმუნებულები არიან , რომ შემდეგი არჩევნები იქნება კიდევ ერთხელ მტკიცედ გადადგმული ნაბიჯი ჩვენი ქვეყნის დემოკრატიულობის თვალსაზრისით. ეს არის ბუნებრივი გამომდინარე იქედან , რომ ჩვენ ვერთიანდებით ღირებულებების ირგვლივ, ვერთიანდებით დემოკრატიული სახელმწიფოს განტკიცების ირგვლივ."- აღნიშნა საქართველოს პრეზიდენტმა.

„2014 წლიდან, მაშინ, როდესაც ჩვენ გადავდგით რეალური ნაბიჯები ევროპასთან ინტეგრაციის თვალსაზრისით, როდესაც ხელი მოეწერა ასოცირების შეთანხმებას და თავისუფალი ვაჭრობის შესახებ ხელშეკრულებას, ნათლად გამოჩნდა, რომ შავი ზღვის სტატუსი უნდა გახდეს სტატუსი ევროპული თანამშრომლობის ზღვისა და ჩვენ ამას ყველა მაღალ ფორმატში და ფორუმში ვაფიქსირებდით. თუმცა სამწუხაროდ ისიც უნდა ითქვას, რომ რეალურად 2014 წლის შემდეგ შავ ზღვაში უსაფრთხოების ფორმატი შესუსტებულია და შავი ზღვის უსაფრთხოება და სტაბილურობა შესუსტებული და გაუარესებულია. დღეს ჩვენ ვხედავთ იმას, რომ ჩვენი პარტნიორები და ალიანსი ძალიან სერიოზულად იაზრებს შავი ზღვის მნიშვნელობას გლობალურად - ევროპული და აზიური სტაბილურობისათვის. განსაკუთრებული როლი ამ კონტექსტში, ბუნებრივია, ენიჭება საქართველოს, ქვეყანას, რომელიც, არაერთ, ალბათ ათეულ ქვეყანას აძლევს ზღვაზე გასასვლელს, სწორედ საქართველოს პორტებიდან გამომდინარე. შესაბამისად იმ დისკუსიაში, რომელიც დაიწყება ნატო-ში და იმ სტრატეგიულ დაგეგმვაში, რომელიც დაიწყება ნატო-ში შავი ზღვის სტაბილურობის თემაზე, საქართელოს ექნება ძალიან მნიშვნელოვანი როლი, როგორც ამ დისკუსიის მონაწილე სუბიექტს და აქედან გამომდინარე, განისაზღვრება ის კონკრეტული ფუნქციები, რომლებიც ჩვენ უნდა განვახორციელოთ, შავ ზღვაზე უსაფრთხოების გაღრმავების თვალსაზრისით.“- განაცხადა საქართველოს პრეზიდენტმა.