ნატო-ს გენერალური მდივანი შემოდგომაზე საქართველოს ეწვევა

პოლიტიკა - 17:39, 09 Jul, 2016

1002

ვარშავის სამიტის ფარგლებში ჩრდილოატლანტიკური საბჭოს სხდომის შემდეგ გამართულ პრესკონფერენციაზე ნატო-ს გენერალურმა მდივანმა იენს სტოლტენბერგმა განაცხდა, რომ შემოდგომაზე საქართველოში ჩამოვა.

„ჩვენ ვაძლიერებთ პარტნიორობის მხარდაჭერას აღმოსავლეთით , გუშინ საგარეო საქმეთა მინისტრები ნატო-საქართველოს კომისიის სხდომაზე შეიკრიბნენ და კიდევ ერთხელ გამოხატეს ჩვენი ძლიერი პოლიტიკური და პრაქტიკული მხარდაჭერა. ჩვენი ძალისხმევა მიზნად ისახავს საქართველოს თავდაცვისუნარიანობის გაძლიერებას და დახმარებას, რომ ქვეყანამ ნატოს წევრობისთვის მომზადების პროცესში პროგრესს მიაღწიოს.

ჩვენ ვაღიარეთ ის პროგრესი, რომელსაც საქართველო აღწევს წევრობის გზაზე. ჩვენ ასევე მკაფიო პოზიცია გვიკავია იმასთან მიმართებაში, რომ კიდევ ერთხელ ვადასტურებთ ბუქარესტის სამიტის გადაწყვეტილებებს. ჩვენ ასევე მტკიცე გზავნილით გამოვდივართ, როცა საქმე ეხება საქართველოს ტერიტორიული მთლიანობისა და სუვერენიტეტის მხარდაჭერას. სწორედ ეს არის ერთ-ერთი მიზეზი, თუ რატომ მოვახდინეთ არსებით პაკეტში სხვადასხვა ელემენტების იმპლემენტაცია. ჩვენ გავაგრძელებთ საქართველოს ძლიერ პოლიტიკურ და პრაქტიკულ დახმარებას , საქართველოს ვიზიტით ვესტუმრები შემოდგომაზე, ჩრდილოატლანტიკურ საბჭოსთან ერთად და ეს იქნება კიდევ ერთი მაგალითი ნატო-ს ძლიერი მხარდაჭერისა საქართველოსადმი, მისი ტერიტორიული მთლიანობისადმი და რეფორმების გატარებისადმი წევრობის გზაზე"- განაცხადა სტოლტენბერგმა.