ავღანეთში მტკიცე მხარდაჭერის მისია 2016 წლის შემდეგაც გაგრძელდება

პოლიტიკა - 14:38, 09 Jul, 2016

1473

ნატო-ს გადაწყვეტილებით, ავღანეთში მტკიცე მხარდაჭერის მისია 2016 წლის შემდეგაც გაგრძელდება.

ამის შესახებ განცხადება ნატო-ს გენერალურმა მდივანმა, იენს სტოლტენბერგმა, ვარშავის სამიტის ფარგლებში გამართულ პრესკონფერენციაზე გააკეთა და დასძინა, რომ "ავღანეთი მარტო არ დარჩება".

პრესკონფერენციამდე ნატო-ს წევრი ქვეყნები და მტკიცე მხარდაჭერის მისიაში მონაწილე ალიანსის პარტნიორები ავღანეთის პრეზიდენტს შეხვდნენ და ქვეყანაში არსებულ მდგომარეობაზე იმსჯელეს.

ნატო ავღანეთის შეიარაღებული ძალების ფინანსურ მხარდაჭერას 2020 წლამდე გააგრძელებს. მტკიცე მხარდაჭერის მისია კი ავღანეთში 2016 წლის შემდეგაც გაგრძელდება. ამის შესახებ საუბარია დეკლარაციაში, რომელიც მხარეებმა ვარშავის სამიტზე მიიღეს.

დოკუმენტში აღნიშნულია, რომ საერთაშორისო კოალიცია გააგრძელებს ავღანეთის ძალოვანი სტრუქტურების, მათ შორის პოლიციის, სამხედრო-საზღვაო ძალებისა და სპეცდანიშნულების ძალების გაწვრთნას, კონსულტაციების გაწევას და სხვა სახის დახმარებას.

თავის მხრივ, ავღანური მხარე იღებს ვალდებულებას, გააგრძელოს ძალოვანი სტრუქტურების გაძლიერება, იმოქმედოს ეფექტური სამოქალაქო კონტროლის ფარგლებში, დაიცვას ადამიანის უფლებები, უზრუნველყოს კანონის უზენაესობა და გააგრძელოს რეფორმების გატარება.

ამასთან, როგორც შეხვედრის შემდეგ გამართულ პრესკონფერენციაზე ნატო-ს გენმდივანმა, იენს სტოლტენბერგმა, განაცხადა, უახლოეს პერიოდში გადაწყდება, 2016 წლის შემდეგ ავღანეთში რა რაოდენობის კონტიგენტი დარჩება.